مش من المروءة ولا الرجولة إن الزوج يهدد زوجته بالطلاق ... او بالجواز التاني ( على سبيل التهديد) مع كل مشكلة صغيرة
ومش من العقل إن الزوجة تطلب الطلاق او تهدد بيه مع كل مشكلة صغيرة بتحصل في البيت
((الأحسن إننا ننفصل - خلاص كل واحد يروح لحاله - أنا هاتجوز عليكي))
مش دايما شريك حياتك هايفهم العبارات دي بمعنى (أنا تعبان من الوضع ده ولازم الوضع يتغير ... و يالا نشوف حل للمشكلة )
لكن في الغالب هايفهمها بمعنى (( أنا مش عاوزك ومش عاوز اكمل معاك ... وقادر أستغنى عنك)) .
وساعتها بدل ما الطرف التاني يتحفز لحل المشكلة ... ممكن يتحمق لكرامته ويرد عليك ويقولك (وانا كمان مش عاوزك)
او لو إستجاب لطلباتك تحت تأثير الفكرة دي .. هايعمل ده وهو مكسور
فمفيش داعي نطرح الطلاق الا لو كان فعلا أحد الاختيارات الجادة للتعامل مع الوضع . . الحياة تحت التهديد مليانة ألم وقلق وبتجرح جامد جدا