قائمة المنقولات ... أحد تفاصيل أعراف الناس في الجواز ... وارد إن ولي العروسة يطلب ده ... ووارد إنه يتنازل عن كتابتها ... في الاخر الموضوع يخضع للعرف والاتفاق بين العريس وأهل العروسة
مش عاوز تكتب قايمة .... وشايف إن أهل العروسة مش من حقهم يطلبوا ده .... يبقى تجهز بيت الزوجية بالكامل بشكل يناسب إمكانياتك .... لكن لو هما شاركوا يبقى الامر يخضع للاتفاق
حلو إننا نحاول نحفظ حق بناتنا ... لكن المبالغة في الأمر ده بالشكل اللي بقينا نشوفه في جوازات كتير ... ده بينقل الموضوع من مساحة حفظ الحقوق لمساحة الابتزاز ولوي الدراع وسياسة البيع والشرا
في مشاكل كتير بتحصل قبل الفرح مباشرة ... وده لأن العريس وأهل العروسة بيبقوا مش متفقين على تفاصيل موضوع القايمة بشكل واضح من الأول ... إتفقوا الاول ... وبلاش فكرة إننا نسيب مناقشة الموضوع ده في الاخر لأن ساعتها كل طرف بيشوف إن التاني عاوز يلوي دراعه.
طول ما الطلاق منتشر ... والأخلاق بقت منعدمة في إدارة مرحلة الطلاق من كل الأطراف في جوازات كتير ...... للاسف سيظل سوء الظن هو المسيطر على المشهد... وهاتفضل الناس بتتجوز وعينيها باصة على الطلاق مع وضع التجارب السلبية المنتشرة في الحسبان
ولحد ما نخرج من النفق المظلم بتاع الوضع الاجتماعي المتأزم... هايفضل المجتمع متخبط جدا في موضوع اتفاقات الجواز ... وهايبقى من الصعب إننا نطالب الناس بالتعامل مع القصة دي بصياغة محددة .