اللي بيدور على شريك مثالي بحذافيره ظنا منه إنه كده هيرتاح .. بيبقى عنده مشاكل أكثر من اللي بيختار على أساس كذا صفة جوهريين بالنسبة له .. و بيبقى حاطط في دماغه إن الجواز دا رحلة نمو .. فيها تغيير و تأقلم وتقريب للمسافات مستمر.
الأول هيعاني لأن معندوش مساحة مرنة للإختلاف عن النموذج اللي في دماغه و عايزة.. و بالتالي كل حاجة عايزها بالضبط .. فلما يكتشف إن في حاجة مش على هواه أو مكنش متوقعها بتربكه وبتهدد راحته وبتعمله مشكلة..
التاني عنده مساحة لقبول الإختلاف دا .. دا كمان متوقعه لأنه حتمي و طبيعي .. وعنده مرونة واستعداد إنه هو وشريكه يلاقوا طريقة حياة وإتفاق مشترك.. حتى لو تضمن دا تغاضي أو تغيير أو تأقلم.. المهم الحياة تمشي وهم الإتنين مرضيين
يعني وجود الحد الأدنى من التوافق مع كثير من المرونة وتقبل الإختلاف و القدرة على التفاهم والتعلم من الأخطاء و الوصول لأرض مشتركة .. أفضل و أنجح من كثير من التوافق في المواصفات وقليل جدا من التسامح مع الإختلاف أو فقر مهارات التعامل مع الخلافات.