الزوجين المحظوظين فعلا هم اللي كل طرف فيهم عنده رغبة في تحسين حياته الزوجية ..معندوش مانع يقرا ويعرف ويصلح ويتغير ويرتقي بحياته.
على النقيض بقى أكثر زوج تعبان أو وزوجة تعبانة هم اللي متجوزين حد على نظام أنا زي الفل ومابغلطش .. ومش محتاج أعرف أو أتعلم .. مش مقتنع ان ممكن يكون عنده فكرة غلط أو معلومة ناقصة أو مهارة واقعة لو اتعلمها علاقته هتبقى أحسن أو طبع عايز يتحسن .. لا أنا الحمد لله زي الفل ومش محتاج اعرف حاجة ولو عندك معايا مشكلة تبقى مشكلتك.. حلها بنفسك .. ودي أسوأ صفة ممكن الإنسان يبتلى بيها حقيقي.
لما تيجوا تختاروا شوف الشخص اللي قدامك أنهي عقلية فيهم .. العقلية اللي اوك نتعلم ونتغير و نستثمر في علاقتنا عشان تبقى أحسن.. ولا عقلية انا مابغلطش و مش محتاج أتعلم ..
لأن وجود أو غياب العقلية دي .. هيعتمد عليها جزء كبير من سعادتك أو تعاستك في اللي جاي كله .. العقلية دي اما بتخليك مطمن ان أي مشاكل جاية هنقدر نتفاهم فيها ونتعاون في حلها ونتعلم كل واحد كان دوره ايه في المشكلة و نتغير عشان ماتتكررش .. ونحس ان في اتنين شايلين العلاقة وهمهم عليها
أو
على الناحية التانية
هتفضل تشتكي طول عمرك انك عايش مع شخص مش بيسمع ولا مقدر احتياجاتك ولا بيعترف بخطأ و لا عنده استعداد يتغير ويبذل مجهود بسيط عشان يحسن علاقتكم ولا جودة علاقتكم لها قيمة ذات أهمية في حياته اصلا .. باختصار هتعيش تصلح من طرف واحد و دا مابينفعش.
و المشاكل اللي بنشوفها حوالينا تشهد على ذلك
وطبعا طبعا وانت بختار وبتدور على العقلية دي في اللي قدامك .. إتأكد إنك تمتلكها أولا.