عشان تحل مشكلة لازم تغير العقلية .. لأن العقلية أو نمط التفكير هو اللي أنتج المشكلة .. فلازم نغير نمط التفكير خالص لنمط تاني صحي و صحيح
- عندنا عقلية عدم الإعتراف بالخطأ .. اللي لازم تتغير إلى إن كل واحد يعترف بالجزء الخاص به من الغلط مش لازم واحد بس يكون غلطان.
- عندنا عقلية (انت السبب أو إنتي السبب) اللي لازم تتبدل بعقلية (تحمل المسؤولية) .. كل واحد يتحمل مسؤولية أفعاله واختياراته و أخطائه .
.
- عندنا عقلية ( الخلاف يعني نكد) لازم نستبدلها بعقلية (الخلاف يعني فرصة أعرف إحتياجات شريك حياتي أكثر).. وأهم حاجة أسمعه عشان أعرفها و عشان أقدر ألبيها.
- عندنا عقلية (أطلع من الحوار منتصر وأكون بعرف ألف الترابيزات و محدش ياخد معايا لا حق ولا باطل ) ودي عقلية عيال ومراهقين .. عقلية الكبار هي عقلية الإنصاف الرغبة الحقيقية في حل يرضي الطرفين .
- عندنا عقلية اسمها عقلية (أنا راجل) .. دي لازم تتغير لعقلية ( حتى الراجل يعاتب على أخطائه وعليه واجبات كما له حقوق )
- عندنا عقلية ( اعرف لوحدك و الإهتمام مابيتطلبش) لازم تستبدل بعقلية إن كل واحد يعبر عن إحتياجاته بوضوح و لطف.
- عندنا عقلية (بتجوز عشان أهو سنة الحياة) إلى عقلية (بتجوز عشان نلبي إحتياجات بعض على كل الأصعدة مادية و عاطفية و نفسية و حميمية)
- عندنا عقلية ( الخصام المطول والتقل) .. لازم تستبدل بعقلية الإصلاح السريع و عدم ترك الأمور لخطر التراكم
- عندنا عقلية الجمود (مابعرفش - أنا كده و مش هتغير) لازم تتغير لـ (العقلية المرنة) إن الواحد لازم يسعى لتحسين حياته عشان تبقى مصدر سعادة ليه مش نكد و دا لازم يتطلب إنه يقوم بتغيير ما )
- عندنا عقلية ( فرض السيطرة والصراع على السلطة) لازم تتغير لعقلية إحنا شركاء حياة و الأدورا متقسمه بالعدل .. كل واحد فينا مسؤول عن حاجة.
- عندنا عقلية ( دورك وواجباتك ) لعقلية ( الإمتنان) تسلم ايدك و شكرا على تعبك حتى لو هو من أدوراك.
- عندنا عقلية (الرك ع الست) .. اللي لازم تتبدل ب مسؤولية نجاح العلاقة مشتركة بين الزوج والزوجة مناصفة.
-عندنا عقلية (رأيي هو اللي هيمشي) اللي لازم تتغير لعقلية التشاور..و الرأي اللي فيه مصلحة العلاقة هو اللي يمشي
- عندنا عقلية ( دماغي و مزاجي وراحتي ) .. لازم تتغير لعلقية win-win .. راحتي و راحتك .. حل وسط
- عندنا عقلية (الناس هيقولوا) .. لازم تتغير لعقلية طظ في الناس اعمل الصح واللي يناسبك.
- عندنا عقلية ( الدراع ) لازم تستبدل بعقلية العقل والتفاهم والإقناع .