أغلب الناس معتقدة إن أكبر مسبب للطلاق هو الخيانة .. لكن في الحقيقة من أكبر مسببات الطلاق هو الإنفصال العاطفي
يعني تمر السنين ونكتشف ان كل واحد بقى في حاله - بقى ليه عالمه اللي عايش فيه لوحده ومرتاح فيه مابنشاركش بعض حاجة .. مفيش تواصل خلال اليوم الا عشان الأكل وطلبات البيت والولاد مفيش تواصل عن المشاعر و الإحتياجات .. مفيش دعم بيقدمه كل واحد للتاني .. ماتعرفش ايه اللي شاغل باله.. مفيش خطط مستقبلية مع بعض.. مفيش عاطفة حية بيتم التعبير عنها .. لما بنفرح بنفرح مع أهل أو أصدقاء مش مع شريك حياة .. مفيش physical touch "حقيقية" و لا حتى eye contact .. إلخ
طب إيه الحل لو إكتشفنا إننا ماشيين في السكة دي؟
- الحل نهزم الإيجو اللي عندنا وندعو بعض إننا نتكلم
- و نسمع بعض إيه اللي مزعلنا و باني حواجز .
- نسمع بعض من غير ردود هجومية أو دفاعية
- نسمع بعض بهدف اننا نعرف التاني شايف الموقف إزاي
- و نوضح المواقف ونطيب الخواطر ونعتذر عن الجزء بتاعنا من الخطأ
- و نعرف إحتياجات بعض و نتفق نطلبها بوضوح
- و نتغير على قد ما نقدر عشان خاطر مصلحتنا وسعادتنا
- و نبذل مجهود عشان نعبر عن الإهتمام بالإحتياجات دي
- و نشارك بعض كل حاجة أحداث أفكار مخاوف أحلام إنجازات
- و يبقى لينا عادات طقوس نستمر عليها طول الحياة زي مثلا طقوس استقبال و توديع يومي - ان ناكل مع بعض و لو وجبة في اليوم و لنفرض الغدا .. نشرب شاي مع بعض كل يوم و نقعد نتكلم ولو ربع ساعة بس .. لقاء مثلا في الأسبوع -فيلم كل ويك إند في البيت مثلا - خروجة في الشهر - إحتفال بعيد ميلاد بطريقة معينة - إحتفال بعيد جواز - بإنجاز .. بترقية .. إحتفال مفاجئ بدون سبب .. العادات مهمة جدا و بتربط بين الأشخاص جدا
- و ندعي برغبة حقيقية إن ربنا يوفق مسعانا و يؤلف قلوبنا ويبعد عننا شر الشيطان ويملا بيتنا ود وسكينة.