من علامات النضج إنك مايبقاش يهمك رأي أي حد في أي حاجة تخصك .. طالما انت بتعمل اللي يناسبك
و من علامات النضج كذلك إنك ماتقعدش تبرر كل حاجة .. اللي بيحبك هيجد لك الأعذار من نفسه و هيقبلك كما أنت بكامل ظروفك
و من علامات النضج إن ما يبقاش عندك أي مشكلة في إنك تواجه / تنهي أي علاقة أو شغل مسببلك مشاكل بدون خوف وندم لأن المكسب الحقيقي صحتك النفسية .
و كذلك ما يبقاش عندك حساسية ان حد يسيبك أو يبعد عنك .
و من علامات النضج إن بتزداد ثقة في نفسك و بتزداد قدرتك على رؤية الأمور بموضوعية والحكم عليها بشكل أقرب للصحة .
و من علامات النضج إنك بتخرج نفسك برة المنافسات في أي مكان وتسلك طريقك الخاص اللي انت بتحاول تكون فيه أفضل ما يمكن أن تكونه بلا مقارنة مع أي بني آدم .
و من علامات النضج ان يبقى عندك جرأة تعيد تفكير في الثوابت و الموروثات و تقول رأيك بخوف أقل وبتطلع أكبر للحقيقة المنطقية .
و من علامات النضج إنك بتبطل جدل و تبطل مبالغة و تبطل تقديس للآراء و الأشخاص و تبطل تحكم على الآخرين .
و من علامات النضج انك تكون طبيعي وحقيقي أكثر من محاولات الظهور بمثالية .
و من علامات النضج إن تبدأ تهتم بالداخل أكثر من الخارج تلاحظأفكارك و مشاعرك .. تحسن سلوكك و أخلاقك .. تزود قبولك لنفسك .. و تعلى بسلامك الداخلي .
و من علامات النضج إنك ماتنبهرش بالأشخاص لأنك عارف إن كل شخص عنده جانبه اللي مش هيعجبك ولا يعجب حد لكنه مش مطالب انه يعلنه ..
و من علامات النضج إنك تلاقي نفسك بتعبر عن نفسك وليس عما يجذب الآخرين و يعجبهم.
و من علامات النضج ميلك للبساطة أكثر من التكلف والعفوية أكثر من التصنع و التواضع أكثر من الزهو والعجب بالنفس
و من علامات النضج إنك تلاقي نفسك بقيت أكثر قدرة على التسامح مع الأخطاء و العطف على أصحابها و خصوصا اذا كانوا أقل منك في العمر أو النضج .
و من علامات النضج انك تهتم باللي بيهتموا بيك و بيحبوك حب حقيقي أكثر من اللي انت بتطلب ودهم و لكنهم لا يبالوا.
و من علامات النضج إنك تكون أغلى حاجة عندك حالتك المزاجية وصحتك النفسية و انك تكون نفسك .