الموضوع كان أخطاء التفكير أو التشوهات المعرفية
و هي كيفية نظرتك للحياة وتفكيرك في المواقف و تفسيرك للأمور
ندخل في الموضوع علطول
أول خطأ في التفكير هو:
𝟭- ا̲ل̲ف̲ـ̲ل̲ت̲ـ̲ر̲ة̲
يعني إنك تسيب كل حاجة حلوة حصلت و تركز مع الحاجة السلبية الوحيدة و تقيم على أساسها الموضوع كله .. و طبعا مشاعرك بتسمع كلام تفكيرك فتنزعج و تضايق و تتخنق في حين لو بصينا على الموضوع ك باكيدج كده على بعضه و ركزنا مع النسبة الكويسة منه مشاعرنا هتختلف تماما ..
و لنفرض باخد كورس و الإمتحان من 100 و أنا جبت 80 .. في سيناريوهين ممكن يحصلوا حسب طريقة تفكيري
- لو فضلت باصة على ال 20% الضايعين .. و قعدت أتحسر عليهم و أجلد نفسي إزاي ضيعتهم واعمي عنيا تماما عن ال 80% مكسب و اللي هو نجاح عالي جيد جدا بردو .. كده هتمشي مشاعر السخط و عد الرضا و الكآبة معايا كـ ظلي في الحياة.
- لو قلت لنفسي well done و الله .. الحمد لله المرة الجاية هحاول أعمل score أفضل ..
كده نجوت من فخ تفكير كان ممكن يسرق ساعات من عمري لكل موقف واحد .. في حزن وكآبة
في مثال مهم بردو .. تقييم الزواج .. في أزواج بتقيم علاقتهم الزوجية بإيه اللي ناقص و ايه العيوب و السلبيات .. غاضين الطرف تماما عن ايه الحلو و مناطق الإتفاق و الإيجابيات .. فطبيعي يكون غير راضيين و ساخطين .. في حين لو نقلو تركيزهم على ايجابيات شخصياتهم و علاقتهم .. أو حتى وزنوا الإيجابيات بالسلبيات هتلاقي مشاعرهم و نسبة رضاهم إختلفت تماما .
𝟮- ا̲ل̲أ̲ب̲ي̲ض ̲و̲ا̲ل̲أ̲س̲و̲د̲
و دي يعني إما تاخد كل حاجة يا بلاش
أو تحكم على الأمور بإما أبيض أو أسود
متجاهل كل الدرجات الرمادية بين الأبيض و الأسود
يعني إما ناجح أو فاشل .. مفيش بحاول .. بسعى للنجاح .. ناجح بس مش ب 100%
إما طيب أو شرير .. يعني مفيش خيره يغلب شره .. كل انسان فيه و فيه ..
في المثال السابق بتاع نتيجة الإمتحان .. اللي بيفكر طريقة التفكير بتاعة الأبيض و الأسود .. بيعتبر إن ال 80% فشل ..و 100% هي النجاح
و دول غالبا الناس اللي بيستميتوا من أجل المثالية .. و دا طبعا شئ مرهق جدا و مستحيل .. رغم ان السعي نحو المثالية مطلوب بمعنى تحاول دايما تكون أفضل .. لكن بدون ما تقسى على نفسك
و في مثال الزواج .. في ناس كذلك هتعتبر زواجها فاشل .. لأن نجاح الزواج بالنسبة لهم ان ما يبقاش فيه مناطق خلاف خالص .. و دا بردو غير واقعي
الصح اننا نحاول نقبل بالدرجات الرمادية لأنها أكثر استطاعة وواقعية مع محاولة التطور للأفضل .
𝟯- ا̲ل̲ت̲ع̲م̲ي̲ـ̲م̲
اللي هو بسحب نتيجة موقف واحد .. على الحياة كلها
أو بعتبر شخص واحد يعبر عن مجموعة كاملة لمجرد إنه ينتمي إليهم بشكل أو بآخر
يعني مثلا لو مريت بعلاقة غير موفقة .. لو قلت أنا خلاص هفشل في كل علاقة .. يبقى كده وقعت في فخ التعميم .. تعميم نتيجة تجربة واحدة على كل التجارب من نفس النوع .
و لو قلت هي مجرد علاقة كانت لها ظروفها .. و هييجي غيرها و هتبقى أفضل
كده انت تمام .. حكمت على الموقف لوحده .. ماعتبرتوش موقف ضمن سلسلة كلها هتبقى شبه بعضها
لو اتجوزت شخصية مادية و أنانية .. أو خاينة ... ما يبقاش دا الحكم على جنس الرجالة كلهم أو الستات كلهم .. و إلا هتعيش طول عمرك تعاني ..
نحكم على الحاجة لوحدها .. الفرد لا يعبر بالضرورة عن كل اللي ينتمي إليهم .. و الموقف الوحد لا يعبر بالضرورة إنه هيبقى متكرر . تجربتك لا تعبر بالضرورة عن كل التجارب من نفس النوع .
𝟰 - ق̲ـ̲ر̲ا̲ء̲ة̲ ̲ا̲ل̲ـ̲ن̲و̲ا̲ي̲ا̲
أو بمعى أقرب سوء الظن .. اللي هو بنفسر الأمور على أسوأ محمل .. لمجرد الظن .. في حين انه مريح جدا(لك) إننا ناخد كل شئ على محمل جيد .. و نتصرف على هذا الأساسا .. منه راحة بال لينا إحنا ولا نشغل بالنا بايه اللي بيدور في دماغ غيرنا ولا يقصدوا إيه .. و في نفس الوقت لاننخرط في سلسلة من المواقف المترتبة على بعضها كان المحرك الأول لها ظن بلا دليل .. النتيجة دايما مش في صالحك و بتخسرك كتير .. فناخد كل شئ على المحمل الجيد ونبقى مؤمنين بالقانون الرباني "لا يحيق المكر السئ إلا بأهله" ..
𝟱- ا̲ل̲ت̲ـف̲ك̲ي̲ـر̲ ̲ا̲ل̲ك̲ـا̲ر̲ث̲ـي̲
اللي هو نعمل من الحبة قبة .. و دايما نتوقع أسوأ الإحتمالات على الإطلاق لما يحصل حاجة غير متوقعة أو غير مرغوبة .. و دي بتدور موتور الوسوسة و القلق المبالغ فيه .. و بتزود هرمونات التوتر
يعني اتخانقنا .. يبقى هنطلق
عديت سن ال30 يبقى عمري ما هتجوز وكل المتجوزين هيخافوا مني و هيبعدوا عني و هيجيلي أمراض نفسية و هينتهي بي الأمر عجوز وحيده!
المطلوب نبني نتايج واقعية بدون تهويل
اتخانقنا .. هنزعل شوية و هنتراضى و نتصافى و نحاول نعوض وقت الزعل بوقت كويس
عديت ال 30 .. عادي سن الجواز أصلا ارتفع لفوق التلاتين .. هعمل كل حاجة بحبها و نفسي فيها قدر المستطاع .. هعمل علاقات مع الناس أكتر .. لحد ما ييجي النصيب .
فنفكر بشوية ايجابية واعية (مش مفرطة).. نتوقع الأفضل .. نتوقع الأكثر واقعية .. و نبطل سوداوية و نبطل نهول الأمور و نبني نتايج كارثية
دا عشانا إحنا و عشان استقرار نفسيتنا .. دا غير ان الخوف المبالغ فيه دا و انتظار الكارثة المحققة مابيمنعش الحاجة الوحشة انها تحصل ..ب العكس بيمنع الحاجة الحلوة تحصل و أحيانا بتحصل الحاجة الحلوة لكن مابتاخدش بالك منها لأنك قاعد مستني الكارثة .. .. كل مرة تقفش نفسك متلبس بتفكير كارثي حاول تظبط الأمور شوية
𝟲- ا̲ل̲ش̲خ̲ص̲ـ̲ن̲ـ̲ة̲
اللي هو أنا المقصود بكل حاجة .. هي تتشابك شوية مع نقطة قراءة النوايا و سوء الظن
يعني و لنفرض بتشتري حاجة من بياع مافيش بينكم سابق معرفة و طريقته كانت قليلة الذوق شوية
لو قلت لنفسك ان انت المقصود شخصيا من التعامل دا .. يبقى انت كده بتشخصن الأمور
لو قلت بيمر بظروف مش حلوة و مضغوط ( رغم ان طريقته غلط ) بس أي حد هتسوقه الأقدار يكون مكانك بيشتري من البياع دا كان هيتعامل نفس المعاملة .. العيب مش فيا خالص .. كده انت مابتشخصنش الأمور ..
في الحالة الأولانية ممكن يومك يتقفل
في الحالة التانية .. هتنسى بمجرد ما تلف وشك و تمشي .
𝟳- ا̲ل̲آ̲خ̲ر̲و̲ن̲ ̲ه̲م̲ ̲ا̲ل̲س̲ب̲ب̲
وهنا الشخص بيعلق كل أخطائه على الآخرين .. لا يتحمل و لو جزء من المسؤولية عن ناتج أي شئ .. في حين الشخصية الناضجة من أهم و أرقى سماتها إنها بتتحمل المسؤولية ... و بتعترف بالجزء من المسؤولية الخاص بيها لو فيه نقص أو خطأ أو تقصير.
دول أهم أنماط من أنماط التشوهات المعرفية أو أخطاء التفكير.. لكن في أكثر حوالي 10 كمان .. ممكن تبحثوا عنهم لو استهواكم الموضوع
*ملاحظة صغيرة: كوني بكتب مقال عن أخطاء التفكير لا يعنـي ان أنا مابقعش فيها مفيش حد أصلا خالي من الأخطاء دي لأننا اتربينا عليها للأسف .. أنا عن نفسي مريت بيهم كلهم واحدة واحدة والحمد لله ظبطت معظمهم و ياقي كم حاجة لسه بنحاول فيها