مشكلة من مشكلات المجتمع اللي لازم تتصلح .. هي فكرة الناس عن الست المطلقة .
الناس بتعتبر المطلقة انسانة سيئة العشرة .. ولذلك طلقت .. طب ليه مايكونش العكس انه هو اللي سئ العشرة؟ معرفش .. طب ليه مفيش اعتبار انها ممكن تكون انسانة محترمة ومميزة وهو كذلك لكنها عانت من سوء توافق ؟مش عارفة ليه الإحتمال دا مش موجود .. لازم تكون هي اللي غلطانة وسيئة ومش عايزة تعيش ! .. مجتمع سادي جدا تجاه المرأة بشقيه رجال ونساء .
في حين ان الحقيقة الغالبة هي ان الست اللي اختارت تتطلق هي انسانة شجاعة و محترمة وصادقة مع نفسها ..احترمت كرامتها واختارت سعادتها النفسية اللي أهم بكتير من الاستمرار في جوازة بتقتلها بالبطئ خوفا من اللقب ..
المجتمع قاسي جدا جدا معاهم .. بيخيرهم بين اختيارين كلاهما مر .. اما تتحملي سوء التوافق و سوء المعاملة و تتنازلي عن كرامتك وسعادتك و تعيشي .. يا إما هنعتبرك درجة تانية .. اختيار غير مفضل .. هنعايرك انك مطلقة مع انه اختيار شخصي مش عار ولا غلط ولا حرام ولا يدعو للمعايرة أصلا ! .. هنعتبرك معيوبة .. لازم تتنازلي كتييييير جدا لو عايزة تخوضي تجربة زواج أخرى ..
يعني في الحالتين لازم تتنازل .. اما تتنازل وتعيش تعيسة او تتطلق و يضطرها المجتمع للتنازل بردو عشان تتزوج مرة أخرى .. من حد أقل جدا في المميزات والإمكانيات ..
مجتمع عجيب .. نفسي نصلح أفكارنا الخطا دي بقى ونشوف بموضوعية وانصاف .. ونرحم الناس عشان ربنا يرحمنا .