في كذا طريقة تفكير .. بتؤدي في الآخر الى الإكتئاب (مجازا) يعني ممكن نسمي المقال دا طرق تفكير المكتئبين ��
هحاول أقولهم بشرح مختصر
١- مطالبة النفس ب المثالية الشديدة
في ناس بتزعل لو معملتش الحاجة بشكل مثالي كل مرة وعلطول .. الناس دي بتفضل طول عمرها مش راضية عن نفسها .. و المشكلة انهم لو فكروا هيلاقوا إن مفيش حد مطالبهم بالكمال و المثالية إلا نفسهم .. طبعا حلو ان الإنسان يعمل الحاجة بشكل متقن قوي و يوصل بيها لأحسن شكل و نتيجة.. و دا صح .. بس "الضغط على النفس و الأعصاب" عشان يحصل كده هو دا اللي بيعمل مشاكل .. اعتبار ان لو معملتهاش 10/10 يبقى "فشلت" هو دا اللي بيعمل مشاكل .. إحساس "أنا غير كفئ" عشان معملتهاش زي ما الكتاب بيقول هو اللي بيتعب نفسية البني آدم
في حين إن لو غيرنا طريقة تفكيرنا وقلنا لنفسنا إن مش لازم النتيجة تكون 10 /10 .. انا اعمل ما في استطاعتي و أفرح بالنتيجة مهما كانت .. هنعيش فعلا راضيين عن نفسنا و حياتنا ..
2- التفكير في الماضي
مفيش حد منا ماضيه كله سعيد .. لازم يكون مر بمواقف مؤلمة مختزنة في ذاكرته حتى الآن كل يوم يطلعها و يعيش فيها و يستاء منها و ينكد على نفسه و يرجعها تاني و هكذا .. و لو دا بيحصل كل يوم معناها انك هتفضل في نفس المشاعر طول السنين بل كمان بتغذيها كل يوم و هتفضل محبوس داخل دائرة مشاعرسلبية بتموت الحياة فيك بالبطئ بدون مبالغة .. طب ايه الحل .. نفقد الذاكرة؟ لا .. طب مانفكرش في الماضي ؟ لا مش هتقدر .. طب نعمل ايه
قالك تكبر شوية وتغير نظرتك للماضي .. و تقول إن كل اللي حصل دا عشان كان لازم تتعلم دروس معينة من الحياة فايتاك .. و انت كده مش بتضحك على نفسك بالعكس دي حقيقة .. كل اللي حصلك كان فرصة للنضج .. و القاعدة بتقولك مفيش نضج حقيقي بدون ألم .. فـ كل اللي مريت بيه تأهيل رباني عشان تعرف تعيش الحياة بقلب جامد أكثر .. و عشان تقدر تفهم معاناة الآخرين و تتعاطف معاها و تقدم لهم مساعدة حقيقية .. بالنظرة دي تلقائيا هتلاقي مشاعرك تبدلت من الألم و الشفقة على الذات إلى الإمتنان ان دا حصلك في حياتك - و الحمد لله انتهى - و خدت الدرس اللي بدونه كان ممكن تتعرض لآلام تانية أكبر تفوق إحتمالك ..
3- الشخصنة
و دي حاجة كلنا بنقع فها بوعي و من غير وعي
يعني سوء الظن يعني تاخد كل شي على محمل شخصي .. يعني يحصل موقف له أكثر من تفسير .. تقوم تميل لأسوأ تفسير و تقول هو يقصد كده .. فتتضايق وترثى نفسك انا ليه يتعمل معايا كده .. ليه بيكرهني .. وطبعا كرد فعل هتكرهه وهتاخد وضع الدفاع و تعمل مشاكل أكثر (كان عندك مشكلة واحدة بتركيزك عليها و شخصنتها هتثمر عشر مشاكل أخرى) و تدخل في دايرة مفرغة من المشاعر السيئة
الناس اللي بتاخد كل شي على نفسها او على أسوأ محمل عايشين فعلا حياة تعيسة .. بيستهلكوا قلوبهم وأعمارهم في أفكار أغلبها أوهام ..
في حين إن ( حتى لو بيراودك احساس ان الشخص دا يقصدك بفعله او كلامه ) .. خد أفضل وجه تفسير للي حصل منه و تصرف على أساسه.. عارف ليه؟مش عشانه طبعا .. عشان متضايقش نفسك .. عشان سلامك النفسي و راحة بالك اللي هم أغلى حاجة عندك .. عشان انت عندك ووراك حاجات كتيرو أوقات حلوة مستنياك تصنعها و تشارك فيها أهم من أنك تستلك وقتك و تفكيرك و طاقتك النفسية في مزيد من المشاعر السلبية .. فمتنكدش على نفسك و سيب أمر النوايا الماكرة للأشد مكرا سبحانه .. كمان الطريقة دي بتخليك حاسس انك مسيطر على مشاعرك ( مش متسيطر عليك) .. وإنت اللي بتقرر تتضايق ولا متتضايقش ..
4- التقدير المتدني للذات
صورتك الذهنية عن نفسك و طريقة تعاطيك مع نفسك هي بوابتك إما لحياة أكثر سعادة أو أكثر تعاسة .. و دا موضوع كبير يطول شرحه ..
دي كانت "بعض" من طرق التفكير اللي جايبانا كلنا لورا .. و اللي لازم ناخد بالنا منها و نغيرها عشان نفسيتنا تتحسن و شعورنا بالسعادة يزيد .
إن شاء الله لو في فرصة أخرى هكتب الباقي ..