أمهاتنا زمان أغلبهم كانوا متربيين ان تحقيق ذواتهم في الزواج و الأمومة فقط لا غير .. وفعلا دا اللي عملوه .. بس دا زمان .. دلوقتي كل حاجة تغيرت و تطلعات البنات تغيرت و مفهوم تحقيقهم لذواتهم توسع .. مابقتش زواج وأمومة بس .. بقى يزاحمهم الرغبة في الاستمتاع بتجارب كتير في الحياة .. تحقيق الذات في مجال بيحبوه وعندهم قدرة على العطاء فيه _ بجانب الأمومة .. حاجة تشعرهم بالتفرد و بالقيمة و ياخدوا من نجاحهم و تقدمهم فيها احساس بالمتعة و تقدير اضافي لذواتهم ..
نيجي بقى للشباب .. كونوا فكرة ان أي زوجة لازم تكون زي أمهاتنا في تطلعاتهم و طريقة حياتهم .. وان دا نموذج الأم دائما وأبدا .. لا أحلام إلا في عيالها ومطبخها .. لا طموحات .. قاعدة في البيت بتربي العيال وبتاخد بالها من الزوح وقايمة ع البيت وبس .. ودا على فكرة مش عيب .. دا كمان نموذج مريح للراجل .. و الستات كانت راضية ومبسوطة ومكنتش أصلا هتقدر تاخد أكثر من كده لو حاولت عشان مستوى الوعي الإجتماعي ساعتها كان هيقاومها و يتهمها بالاسترجال و النشوز وهينبذها ومكنتش هتعرف تعيش .. بس الحقيقة الماثلة أمامكم بتقول ان الزمن اتغير والبنات بتتربى بشكل مختلف .. الوعي زاد عن الحاجات الانسانية لكل البني ادمين ستات ورجالة و دا سمح لهم بأنهم ينالوا حقوق طبيعية كانت مسلوبة بفعل هيمنة المفاهيم القديمة عن الأنوثة و دور المرأة .. زي التعليم و العمل و وجود أنشطة و السفر و خوض غمار الحياة بمجالاتها المتعددة والمختلفة ..
نرجع للشاب بقى اللي معملش أبديت لمفهوم المرأة ودورها ولسه واقف عند صورة الأم .. هيلاقي صعوبة في انه يعثر على النموذج اللي في دماغه و لووو لقاه هيبقى محظوظ الحقيقة .. متدلع و العيال حد واخد باله منهم و مآمن على مراته في البيت من الاختلاط .. لكن في المقابل هو هيعيش صراع بين اللي بيشوفه بره من ستات لبقين متحدثين ناجحين .. ولها رأي وحضور وفاهمة الحياة و تقدر تتكلم معاها في أي شئ ويتسند عليها في أوقات الضعف ... وبين نموذج الزوجة و الأم التقليدي .. و بيفضل الصراع دا ماثل جواه .. حسب قدرته على حسم الأمور بينه وبين نفسه .
أما لو اتجوز النموذج الحالي من البنات المتطلعات اللي مش بس زواج وأمومة لا انا عايزة من الحياة حاجات كتير .. هيلاقي صعوبة في التوافق .. و هيفضل شايفها انسانة أنانية .. مش طبيعية من وجهة نظره ومش إمرأة مكتملة .. و هيشوفها غير كفئ و تنازعه دوره في الحياة! .. و هي كمان هيبقى عندها شعور مستمر بالحرمان و التضحية و الذنب .. لو معاشتش بالطريقة اللي توافق تفكيرها وشخصيتها ..
اللي عمل أبديت ووفهم الواقع بواقعيته .. بيرتاح ويريح .. مش هيتفاجئ ولا يحس باستغراب .. هيبقى عارف ان من حقها تتعلم .. تقسم وقتها بحيث تلاقي وقت لنفسها ومايقولش عليها أنانية .. تعمل نشاطات .. تشتغل لو تم الاتفاق على كده .. تخرج تتفاعل مع الحياة .. تحصل على فرص زي اللي هو بيحصل عليها كانسان .. ومش محتاجين نقول مع مراعاة الضوابط والحدود في التعامل مع الجنس الآخر بس نقول .. وهيبقى عارف ان دا هينعكس عليه ايجابيا هتبقى سعيده وهتقدر تسعده و تنشر السعادة في البيت .. متطوره و هتقدر تطور حياتهم وعلاقتهم وولادهم .. كل دا بجانب دورها كزوجة وأم _ بس مش وقتها كله رايح في هذا الاتجاه فقط _ كمان هيلاقي حد يتكلم معاه ويسمع رأيه .. يشاركه التجارب .. يسنده .. حد مش هيحس معاه بالزهق لانه منسجم مع نفسه و متجدد .. مش هيحس بفرق بين اللي بيتعامل معهم و زوجته يعني هيحس انه مكتفي .. النموذج دا مريح ومش مريح .. مريح قلنا مريح ليه .. انما مش مريح ليه؟ لأن بيبقى في أحيانا شعور داخلي خافت بالخوف من فقد السيطرة بس دا متوقف على ذكاء الأنثى .. زائد ظهور أعباء إضافية .. حتة الخوف و الأعباء دي هيفهمها بس المجرب .
الخلاصة ..١- اعمل أبديت أحسن .
٢- مش متقبل .. اعرف ان هي باكدج .. كل حاجة لها مميزاتها وعيوبها .. أهم حاجة قبل ما تتجوز تعرف نفسك كويس وتتأكد من النموذج اللي انت تقدر تتعايش مع (عيوبه) عشان متظلمش نفسك ولا تظلم حد .. ورحم الله امرئ عرف قدر نفسه ..