"إذا عَزَّ أخوك فَهُنْ"
على شاكلة "اللي زعلان مني يتفلق" "اللي عايز يمشي يمشي" وكأنها حاجة حلوة وجميلة إن مايكونلكش عزيز، أو تكون بتفرط في صحابك وحبايبك عادي وانت كده واد جامد وشبح بقى ومابيهمكش!
لو كل حد زعلت منه، علمت عليه ونسيت الهيستوري والعشرة والرصيد اللي بينك وبينه.. هتموت لوحدك! الصحاب دول سند! بعيوبهم بمشاكلهم سند مانستغناش عنه!
مفيهاش حاجة أما صاحبك مرة يشد وإنت تلين..
أما مرة تعتذر وانت مش غلطان..
أما مرة تطيّب خاطره وإنت اللي زعلان..
أما مره تراضيه وتستحمله وتقوله كلمتين حلوين وإنت مش فاهم إنت عملت ايه اصلا..
أما تلتمس له عذر وتصبر عليه..
مفيهاش حاجة أما نشيل بعض يا جماعة والله!
إذا عزّ أخوك، فهُن! مفيهاش حاجة تقلل منك ومن كرامتك بالعكس! هو لو بيفهم، هيعرف إنك بتعمل كده عشان هو فارق معاك مش عشان إنت ضعيف، إنك بتكبرّه عشان إنت كبير وعلاقتك بيه كبيرة عندك مش عشان انت قليل، هيفهم إنك You are rising above أياً كان اللي حصل عشان بتحبه فعلا مش عشان أي حاجة تانية! ولو دي حاجة هو هيفهمها غلط، أو هيستغلها غلط.. يبقى ده إختياره هو! مشكلته هو مش مشكلتك إنت! هو اللي محتاج يتغيّر، مش انت اللي محتاج تبطل تبقى حريص على صحابك!
إذا عزّ أخوك فهُن