تعمل إيه لو عندك اكتئاب أو حاسس بضغط نفسي رهيب وبعدم توازن وتوهان؟ القصة كلها في الكلمتين دول ...
١- الحركة Physical Activity
اللي بيمشي ٥ كم في اليوم علشان يروح مدرسته في الأماكن النائية جايز يحس بتعب جسماني لكن مش هيجيله اكتئاب. اللي بتروح تلعب إيروبكس مرتين تلاتة في الأسبوع حتحس بالسعادة بعد التمرين حتى لو كان مرهق. اللي حركته قليلة جدا ومرابض في مكانه ده احتمالية تقلب مزاجه بتكون أعلى وتعرضه لعدم توازن نفسي. امشي شوية في الشارع أو العب ٥ دقائق رياضة في البيت الصبح هتفرق بشكل رهييب في مزاجك النفسي وهتظبطلك يومك كمان حتى لو كانت ٥ دقائق بس.
٢- التعبير Self Expression
اللي بيرسم بتلاقي مزاجه معتدل أكتر وبتلاقيه أكثر اتزانا بعد الرسم، الرسم ممكن يكون حتى علاج نفسي. اللي بيعزف موسيقى نفس الشيء بيحس باتزان أكتر بعد ما بيعزف. ما لكش لا في الرسم ولا في الموسيقى اكتب مذكراتك كل يوم أو حتى أفكارك اكتبها بالورقة والقلم في كشكول. ذهنك هيصفى وهتعرف تفكر أحسن والدنيا هتصبح أوضح وهتحس براحة أكبر وانسجام نفسي. عبر عن نفسك بأي وسيلة تناسبك هتلاقي نفسك بقيت أحسن. اللي بيكتم في نفسه وما يعبرش عن اللي جواه من أفكار وإحساس ممكن يجيله مش بس إحساس بالضيق لا ده كمان أمراض نفسية بل وبدنية كمان. ما تكتمش في نفسك، عبر عن اللي جواك بأي طريقة.
٣- قابل الناس Socialize
ما تنطويش على نفسك ولا تقفلش على نفسك، أيوة الواحد بيحتاج ساعات يقعد مع نفسه، لكن ما تخليش ده السائد في حياتك. قابل الناس وشوفهم واتكلم معاهم واسمعهم واتحاور هتلاقي نفسك بقيت كويس وهتحافظ على صحتك النفسية وتوازنك النفسي. الانفراد والتقوقع لفترات طويلة متصلة ممكن يسبب أمراض عقلية ويبوظ التوازن النفسي بتاعك. قابل الناس، اسمعهم، اتكلم معاهم.
٤- رؤية Vision
لو عندك هدف نفسك توصله وبتعافر في سكتك فمهما تعبت هتلاقي حاجة بتشدك لقدام لإنك عايز توصلها. وجود رؤية لحاجة نفسك توصلها ده بيظبط حياتك كلها. طبعا النقطة دي رغم أهميتها مش دايما بتبقى متاحة لإن أحيانا الواحد بيفشل أو الدنيا بتضلم خالص ومش بيكون شايف بصيص أمل في إنه يوصل للي نفسه فيه. لو اختفت من عندك رقم ٤ دي في وقت ما فتمسكك بال ٣ نقاط الأولى هيخليك تحافظ على توازنك النفسي وما تنزلقش في بئر التوهان والاكتئاب.
روشتة الخروج من الاكتئاب باختصار: العب رياضة خفيفة ٥ دقائق كل يوم، اكتب مذكراتك ولو صفحة واحدة كل يوم باللي حصل امبارح، لو قدرت تتكلم مع ناس وتقابلهم وتسمعهم يبقى كويس جدا ولو ما قدرتش فركز على رقم ١ و٢ يوميا. لو عندك رؤية وطموح فمافيش حد هيقدر يوقفك ولو ما عندكش فاتمسك بباقي الحاجات هيحفظوك من التوهان والسقوط في دوامة وحشة.