كل واحد بيدور على الأفضل له ولأولاده في المستقبل. في اللحظة اللي أنت بتقرا فيها الكلام ده في واحد في مصر نفسه يسافر الخليج عشان يزود دخله ويعرف يصرف على ولاده ومراته اللي هيسيبهم في مصر. وفي نفس اللحظة في واحد تاني عايز يسافر مع مراته وولاده للخليج عشان الإستقرار الأمني والاجتماعي من وجهة نظره. وفي نفس اللحظة في واحد بقاله عشر سنين في الخليج وشايف الدنيا صعبة وبتزداد صعوبة وبيرجع مراته وولاده على مصر تحسبا لأي مشاكل في شغله. وفي نفس اللحظة في واحد بقاله خمس سنين في الخليج ونفسه يهاجر على كندا أو أستراليا عشان ياخد جنسية عدلة من وجهة نظره ويأمن مستقبل ولاده. في نفس للحظة في واحد ومراته عايشين في أمريكا من عشر سنين لكن عايزين يرجعوا مصر عشان تربية الولاد لأنهم بيعانوا مع ولادهم في أمريكا. وفي نفس ذات اللحظة في واحد مصري في أمريكا من سنين لكن عايز يهاجر لكندا عشان الجو العام هناك أكثر تقبلا للعرب والمسلمين. وغيره وغيره...
كل واحد عنده تحدياته ومفيش حد عايش في حتة مرتاح تماما وقاعد بيراقب أسراب القريدس. الإنسان محتاج يختار بناء على المتاح قدامه من معلومات وفرص لكن عليه إنه يدرك إن أي اختيار له مميزاته وعيوبه وهي مش بتيجي غير كده. الأهم إن الواحد يدرك إن الناس مش كلها زي بعضها واللي يناسبك ممكن يكون قاتل لغيرك. فيا ريت تختار اللي يناسبك وترضى بيه وبلاش تشغل دماغك بالآخرين ولا تقعد تقارن نفسك بيهم لأن كل واحد عنده تحدياته...