هتكتشف بعد الجواز ، ان الحب مش بس في كلمة حلوة او في نظرة عين او في خروجة وهدية ومورنينج تيكست ..
هتكتشف ان الحب ليه صور تانية.... وبيتبلور بشكل مختلف.
هتلاقي الحب في لحظة تعب بعد يوم شغل طويل ومستحمل ده عشان توفر لأهل بيتك حياة كريمة...و مع ذلك تفعد تلعب مع ابنك لأنك عارف انه محتاج انه يتنطط في حضنك.
او في لحظة صمت في لحظة إنفعال شريك حياتك في وقت انت عارف انه مضغوط.
او في اللحظة اللي الام مضطرة تنام فيها علي جنب واحد طول الليل عشان ترضع طفلها .
او اللحظة اللي الأب والام بيجروا فيها ع المستشفي عشان بنتهم سخنة وبترجع.
او في لحظة صبر من أم مستحمله فيها إستعباط إبنها البطيخة اللي مش عاوز يكتب الهوم وورك...عشان عاوزاه يتعلم
او في لحظة قلق لما تلاحظ مشكلة عضوية او سلوكية في حد من ولادك
او في اللحظة اللي بتاخد قرار انك تشتري حاجة لشريك حياتك او حد من ولادك علي حساب حاجة كنت انت مخطط تشتريها لنفسك.
او في لحظة اعتذار او قبول اعتذار بعد كل خناقة... حتي لو انت جاي علي نفسك وانت بتعتذر او بتقبل الاعتذار.
متخلوش بتوع الأفلام والأغاني يفهموكم ان الحب بيتحس في كام لقطة محددين ... بعد الجواز الحب ليه صور مختلفة ... وانا مالقتش وصف أحسن من وصف رب العزة لما قال ( وجعل بينكم مودة ورحمة)
وده لا يعني أبدا إننا نستغني بعد الجواز عن نظرة العين والهدية ولمسة الايد والمورنينج تيكست