 | |  |
|
النايفه بمدونتها !
ذكرت الشاعره مويضي البرازيه انها ماتبي الشجعان تبي ضعيف الحال !!
لاوالله مويضي تبي خبل لكن انقلب الوضع عليها ..
بحكي لكم قصتها ..
هذه مويضي ترد على اخته ( بنا )
اختها تقصد وتمدح زوجها الطيب
هي دخلت بالعكس قالت مابي الكريم اللي كل يوم وانا اغسل قدوري من وراه
ومابيه شجاع كل يوم وهو معركه ويدي على قلبي اما مذبوح والا ماخوذين
ابي واحد مايتعدى البيت
تقول بنا البرازي :
شوقي غلب شوقك على هبت الريح
محصل(ن)فخر الكرم والشجاعه
وركاب شوقي كل يوم(ن)مشاويح
واليا لفى صكوا عليه الجماعه
يالبيض شومن للرجال المفاليح
لاتقربن أهل الردى والدناعه
فردت مويضي البرازي :
ماهم بغاويني رجال الشجاعه
ودي بهم مار المناعير صلفين
أبغاه مندسٍ بوسط الجماعه
يرعى غنمهم والبهم والبعارين
واليا نزرته راح قلبه رعاعه
يقول ياهاف الحشى ويش تبغين
وأن قلت له هات الحطب قال طاعه
وعجلٍ يجيب القدر هو والمواعين
ولو أضربه مشتدةٍ في كراعه
ماهو بشاكيني ولا الناس دارين
في احدى المرات قالها زوجها ياطويله الحجب .. اي ياطويله الكراعين او الساقين /
هنا ظهرت مويضي بقصيده هجائيه على زوجها اللي تمنته .!!
طول الحجب ماعذربن كل قبّا
يوم اللقا مايركبه قاصر البوع
.
اجلس ببيتك جعل بيتك يهبّا
ياعل بيتك بين الابيات مجدوع
.
عسى الصغيّر بيننا مايربّى
عساه مايلعب على فرخ جربوع
| |
 | |  |
تعقيب بسيط على مدونة الفاضل طاغي النظره
هذه الأبيات تردد على مسامعي دائما
تقريبا حافظه أغلبها وأعلم لما قيلت
مويضي البرازيه تقول
ماهم بغاويني رجال الشجاعه
ودي بهم مار المناعير صلفين
ماهو خافيها الرجال " المشاكيل " الشجعان
ولاعافتهم لقلّة سنع فيها ورفاله
لكن لأنها تعرف الصلف اللي عندها مايقبل الحيف
وراس صلف مايعيش مع صلف
بل إنه لما عابها زوجه " ضعيف الحال "
نكبت عفشه وعافته وعافت بيته
معلومه جميله وعذبه اللي أوردتها بمدونتك