فى تجربة لطيفة أوى اتعملت على بعض الشباب اللى تعرضوا للرفض والتجاهل العاطفى مؤخرا بعد ما عرضوا حبهم على شخص ما و تم الضرب بعرضهم عرض الحائط ، وجدوا ان المواد الأفيونية المسؤولة عن تسكين الألم فى الدماغ بدأ يتم إفرازها عندهم بنفس القدر اللى بيحصل فى حالة تعرض الشخص للإصابات والآلام الجسدية الشديدة
الدماغ ماقدرتش تفرق بين الألم الجسدى والألم النفسى و تفاعلت معاهم بنفس الشكل بالظبط ، الدماغ تعاملت مع الرفض والتجاهل زى ما بتتعامل مع حادث سيارة ، اللطيف ان المستقبلات الأفيونية فى الدماغ فهمت ان الألم النفسى لا يقل وطأة عن الألم الجسدى فى حين ان بعض البشر لسه مافهموش
الألطف كمان انهم اكتشفوا ان البشر القادرين على تجاوز المحن النفسية بسهولة هم البشر اللى عندهم مستقبلات أفيونية أكتر فى العدد وأكثر نشاطا فى حين الناس اللى بتجد صعوبة فى تجاوز المحن النفسية بتكون المستقبلات عندهم أقل فى العدد والنشاط بكتير
يعنى الشخص اللى بيفضل بالأشهر الطويلة يعانى من أثر أذى نفسى تعرض له أو تجربة صعبة مر بيها مش لازم أبدا يكون ضعيف الإرادة أو بيتدلع وبيستهبل وبيحب النكد وبيستمرئ دور الضحية ومايستاهلش تعاطفنا وكل الاحكام الجاهزة دى ، الامر له محددات جينية و بيولوجية أكبر منه بكتير ، فياريت بس نراعى بعض شوية ومش علشان ربنا أنعم علينا بشوية قوة نفسية نبتدى نحكم على غيرنا لإن الامور فى أحيان كتير بتكون أكبر وأكثر تعقيدا من أحكامنا الضيقة دى بكتير