في متلازمة نفسية اسمها sorry syndrome أو متلازمة الاعتذار ، الناس اللي بتعتذر علي كل حاجه ، سواء حاجات تستاهل الاعتذار أو متستاهلش ، سواء عملوا حاجه غلط او ماعملوش ، سواء طلب الطرف الآخر اعتذار منهم أو ماطلبش ، سواء مقتنعين أنهم غلطوا أو مش مقتنعين، بيعتذروا للبشر و الشجر و المطر و للجماد والحيوان و عندهم احساس أنهم عبء علي العالم و محتاجين يعتذروله عن وجودهم
الناس دي بتعمل كده ربما كجزء من القلق الإجتماعي اللي بيخليهم يحسوا دائما أنهم سخفاء و هيتعرضوا للانتقاد فبيبادروا بالاعتذار في محاولة لتفادي الانتقاد أو اعتقادا أن دا هيظهرهم بشكل افضل أو بيعتذروا كجزء من شخصية اعتمادية حاسه انها مضطره تعتذر دائما علشان تنال رضا الطرف الآخر و تضمن بقاؤه أو بسبب شعور عميق و مبالغ فيه بالذنب كأحد اعراض الاكتئاب ربما أو حتي كعادة سيئة اعتاد عليها الشخص من الصغر و اصبحت شئ ملازم له في كلامه بيعمله بدون قصد أو انتباه
ايه المشكله في موضوع الاعتذار دا ؟ المشكلة أنه بيعطي انطباع سئ عن الشخصية أنها ضعيفة أو فاقدة للثقة و بيعرض الطرف المعتذر للاستغلال و بتخليه مش قادر يطالب بحقوقه أو يقول لا علي حاجه مش عاجباه و كمان بتفقد الاعتذار قيمته الحقيقه لانه بقي بيتقال عمال علي بطال
ازاي نتخلص منها ؟ محتاجين أننا نعالج سببها لو ليها سبب سواء قلق اجتماعي أو اكتئاب أو اعتمادية عن طريق العلاج النفسي أو البحث والتطوير الشخصي، و محتاجين نتذكر مع نفسنا مواقف اعتدنا فيها علي الاعتذار و نراجع الشات بتاعنا مع الناس و نشوف كمية الاعتذرات الغير ضرورية فيه و نرص مع نفسنا كل المواقف اللي متعودين نعتذر فيها بحيث لما تتكرر تاني نكون منتبهين لحدوثها و مستعدين مسبقا باستراتيجية جديدة للتعامل مع المواقف دي و بجمل جديدة تحل محل جملةالاعتذار السخيفة عديمة الجدوي تماما