في ظاهرة معروفة في علم النفس تعرف بال imposter syndrome أو متلازمة المحتال ، و دي بتحصل للناس المعروفين بنبلهم وأخلاقهم العالية و طباعهم الطيبة ، بيحسوا دايما انهم زائفين و ان انطباع الناس عنهم غير مستحق ويوما ما سيكتشف العالم خداعهم و زيفهم ، شعورهم دايما بعدم الإستحقاق و خوفهم من انكشاف حقيقتهم بيجبرهم علي اخفاء ما يعتقدون انها جوانبهم المظلمة خلف اقنعة محكمة تماما بدون ما يتركوا لنفسهم الفرصة انهم يعرفوا ان الجوانب دي هي افضل جوانبهم علي الإطلاق ، لإنها الأكثر خصوصية وتفرد ، روحهم الخاصة اللي بتميزهم عن العالم كله ، بصمتهم الشخصية اللي مش متكررة في العالم مرتين
دا اللي بيحصل لينا كلنا ، بنحس ان في جزء منا غير جدير بالحب والقبول ، جزء عديم القيمة يجب حجبه عن الآخرين ، جزء لو انكشف للعلن سيتخلي العالم عنا و يتوقف البشر عن أنهم يبادلونا الحب و الإعجاب
في العلاقات العميقة بتتحول الاجزاء المخفية دي لحاجز بين الطرفين ، يتخفي الحب مثلا ورا قناع عدم الإهتمام ، كنت أعرف صديق تظاهر أمامنا مرة بعدم تذكره لفتاة كنا نتحدث عنها ثم تزوجها بعدها بشهور قليلة ، يبدو ده مفهوم طبعا ، الإهتمام ضعف واحتياج يجب اخفائه بكل حنكة و مهارة
الأقنعة دي بتحرمنا من رحلة علاجنا من الجروح ، زي فازة مكسورة بنحاول نلملم اشلائها علشان نعيد ترتيبها من جديد بس في قطع ناقصة ، مخفية ورا الأقنعة هتحرمنا دايما من الالتئام
فاني برايس له مقولة جميلة بيقول فيها : دع العالم يعرفك كما انت ، علي حقيقتك تماما ، وليس كما تعتقد انه يجب أن تكون ، لأنه إذا كنت تتظاهر فيوما ما ستنسي تظاهرك ، و وقتها من سيكون انت ؟