من المهارات اللي بيفتقدها بعض الناس وبتؤدي الي أنهم يصبحوا عرضة للإضطرابات النفسية هي مهارة طلب الدعم وقت الحاجة
الناس دي وقت الحزن أو القلق أو الضغوط والمشكلات بيزدادوا ابتعادا عن محيط الدعم بتاعهم ، بيقفلوا أبوابهم و بينعزلوا في ركنهم و بيتركوا أنفسهم وحيدين تماما مع أكثر أفكارهم سوادا و عتمة و بتكون النتيجة أن حزن الوحدة و العزلة بيضاعف من الحزن الأصلي و بتكتمل دائرة الحزن الي ما لا نهاية
ليه الناس دي بتعمل كده ؟ بعضهم بيعمل كده علشان عنده تصور أن مفيش حد هيعرف يحل مشكلته و بالتالي فطلب الدعم بيبدو له سلوك ساذج وبلا جدوي ، في الحقيقة مش الهدف الوحيد لطلب الدعم هو حل المشاكل ، مجرد المشاركة بتقلل شعور الوحدة و العزلة و وجود ناس بيقلل مشاعر العجز و اليأس و احيانا بيكون سبب اعتقادك أن المشكلة بدون حل هو انك ماشركتهاش مع حد أيده في المية و قادر يفكر بصفاء ذهن اكبر ويفتح قدامك بدائل اكتر واكتر
بعضهم مش بيطلب الدعم علشان بيحس أنه بكده هيكون عبء وتقيل ع اللي حواليه أو هيبان دائما في مظهر الكئيب و الناس هتكرهه و هتنفر منه مع الوقت ، الحقيقة أن الناس في الغالب بتحب تحس بالأهمية عند الشخص وجزء من الأهمية دا أنه يلجأ ليها وقت الحاجة و بترحب بمشاركته لحزنه لو أمره بيهمها فعلا و لو حد قلقان يتحول لشخص شكاء بكاء ممكن يعمل لحزنه مقياس و ليكن من واحد لعشره ، لو حزنه أقل من خمسه يحتفظ بيه لنفسه و لو بدأ يعلي فوق الخمسه يشارك بيه المقربين منه واللي يغلب علي ظنه انهم هيكونوا مرحبين بيه
مهارة طلب الدعم هي اكبر و اهم مهارة بتكسر دائرة الحزن والقلق والألم النفسي و يتمنع من بدري تطورهم لإضطرابات نفسية فلو سمحت ماتترددش انك تطلب الدعم وقت الحاجة علشان تسند نفسك فتقدر تسند اللي حواليك وقت ما يحتاجوا دعمك هم كمان