بحب جدا علاقة الناس بأدوات أكل عيشهم ، لما سواق التوكتوك كان بيحكيلي بحماس أنه بيصحي بدري ينضف التوكتوك بتاعه لغاية ما يخليه عروسه و أنه بيحوش علشان يجيبله باب جلد علشان يبقي فيه كل الكماليات ، اهتمامه بإختيار الحكمة اللي هتتكتب عليه والاكسسوار اللي هيتحط فيه ، علاقة اب بإبنه مش سواق بالتوكتوك بتاعه
في مرة و انا في الاستقبال حضر راجل كبير في الخمسينات من العمر بيعاني من شلل نفسي في نصفه الأيمن بدون أسباب عضوية ، الشلل حصل لما الجاموسة بتاعته ماتت ، راجل كبير عدت عليه مصائب كتير لكن الحاجه اللي قسمت ضهره فعلا كان موت الجاموسة
كان عندي برضه مريض صياد و كان بيتكلم عن المركب بتاعته بوله و عشق كإنه بيتكلم عن حبيبته بالظبط ، الناس دي بتحس بإمتنان حقيقي تجاه ادوات رزقهم لإدراكهم ربما لقيمة الرزق و فضل ربنا عليهم فيه، علاقات عاطفية و وجدانية شديدة العمق بفعل أكل العيش و العشرة و حفظ الفضل تبدو أعمق من كتير من العلاقات الإنسانية اللي تخلوا من العطاء و من أسباب للحب والفضل و الإمتنان