من أكتر أنماط البشر اللي بتكون ضيف دائما علي العيادات النفسية هو نمط ال people pleaser ، البشر شديدي اللطف اللي بيسعوا دايما لإرضاء الآخرين ، اللي بيتفانوا في مساعدة غيرهم و مش بيقولوا أبدا لأ علي أي شئ يتطلب منهم ، الناس اللي معروف عنهم انه يمكن الإعتماد عليهم و بيكونوا حاضرين دايما في اللحظات الصعبة ، البشر اللي بتقضي معظم أوقاتهم في صنع أشياء جميلة للآخرين مش لنفسهم
النوع دا من البشر بيكون عنده رغبة عنيفة في الحصول علي القبول من الآخرين و خوف شديد من الرفض ، ربما بسبب تجربة سابقة تعرضوا فيها للرفض و فضلت علطول بتعذب عقولهم اللاوعية و بتدفعهم دايما لتجنب اختبار نفس الألم مرة تانية
النمط دا بيكون معرض جدا لكل الأمراض النفسية لإنه بيكون مهمل تماما في تلبية احتياجاته و مقصر جدا في حقوقه الشخصية
كمان لإنهم بيكونوا غير قادين علي الإستمتاع بالحياة لإن نداء الواجب دايما بيحرمهم من أبسط حقوقهم في وقت ليهم و لمتعتهم الشخصية مش للآخرين
الأهم انهم بيكونوا معرضين دايما للإستغلال والأسوء انهم بيكونوا جاذبين جدا للأشخاص المستغلين ، احنا اللي بنحدد الطريقة اللي هيتعامل بيها الآخرين معانا و النمط دا بسبب سعيه المبالغ فيه لإرضاء الآخرين بيحصل علي أسوء معاملة ممكنة و بيجذب ليه أسوء انواع البشر
و ياريته بعد كل دا بيحصل فعلا علي القبول ، كل خير بيقدمه النمط ده للآخرين بيتم اعتباره من قبلهم مش كفضل وانما كحق مكتسب و عند أول خطأ او تقصير هيحصل النمط دا علي الرفض ، اكتر شئ بيخاف منه و أكتر حاجه فضل طول عمره بيعمل المستحيل علشان يتجنب حدوثها