في جملة بحبها جدا اتقالت في فيلم مطب صناعي علي لسان أحمد حلمي لما كان بيحاول يقنع محمد متولي تاجر البطاطس أن يبيع البطاطس فلما الراجل سخن كده وقاله عليا الطلاق البطاطس كلها بتاعتك احمد حلمي قاله ايوه هو دا الحاج اسماعيل اللي انا اعرفه
بحب استخدم الجملة دي لما حد من اللي بحبهم يعمل حاجه تضايق لكنها معتادة منه ، زي أنه يوصل متأخر مثلا ، لما باجي اتضايق منه لفتكر الجملة دي وابتسم ، هو دا صاحبي اللي انا اعرفه طول عمره بيتأخر عن ميعاده ، لو في يوم جه بدري هحس بالغربة و انعدام الألفة والتشويش ، أصبح وصوله المتأخر زي كود معرفة بيني وبينه و صلة خفية بتربطني بيه
انا من الناس اللي بتنام علي نفسها وهي بتتكلم في التليفون أو الشات، اصدقائي في الاول كانوا بيتضايقوا من دا و بيعتبروه قلة اهتمام لكن مع مرور الوقت مابقوش بيتضايقوا منه ، بقوا بيضحكوا و بيقفلوا الخط من سكات وبنكمل كلامنا تاني يوم ، دي حاجه مش هيعملها غير اصحابي اللي بيحبوني و اللي بمتن ليهم جدا بده و بحس برابطة خاصة بيني وبينهم بسببه ، دول اللي بيستحملوني لما بنام علي نفسي وأنا بتكلم معاهم
هو دا الحاج اسماعيل اللي انا اعرفه ممكن الناس تعتبرها تشجيع علي اعتياد صفات يجب رفضها لكن أنا في الحقيقة بشوفها قبول و حب و تفهم لعدم كمال النفس البشرية