في أغنية لرامي صبري اسمها حياتي مش تمام بيتكلم فيها عن إجراءات حاول يتجاوز بيها علاقة عاطفية منتهية زي أنه بدأ يشغل نفسه بناس تانيه كتير و بطل يجيب سيرتها خالص وقطع علاقته بكل الأصدقاء المشتركين و خاصم الشوارع اللي جمعتهم و بطل يسمع الاغاني المشتركة و حاول مايفضيش نفسه خالص و لا يسيب نفسه لوحدها و لو دقيقه علشان مايفكرش فيها أبدا و بيستغرب بعد كل الاجراءات دي أنه لسه مفتقدها و ان حياته مش تمام
هو حياته مش تمام لانه عمل كل حاجه غلط ممكن تتعمل ، السلوك التجنبي الشديد اللي اختاره علشان ينسي اعطي إشارة وامر لعقله أنه اوعي تفكر في الموضوع دا ، الموضوع دا خطير وهيسببلك ألم شديد مش هتعرف تتحمله ، العقل علشان ينفذ الأمر دا بيكون في حالة استثارة دائمة زي اللي معرض للخطر و قاعد يتلفت يمين وشمال ، بيراقب أفكاره ومشاعره علشان يضمن أنها ماخرجتش برا السيطرة
اسرع ناس بتتجاوز العلاقات المنتهية هم الستات لإنهم بيسمحوا لنفسهم يحزنوا عادي ويعيطوا ليل نهار و يستعينوا بكل أصدقائهم و يحكوا الحدوته مرة واتنين لحد ما حساسيتهم ليها تقل وتبطل تسبب نفس قدر الحزن اللي كانت بتسببه في الأول
كلنا بنحتاج المرحلة دي بعد أي أزمة ، مرحلة معالجة الأزمة ، أننا نحكيها و نخرج مشاعرنا تجاهها و نطلب مساعدة المقربين مننا علشان يطمنونا تجاه أي أفكار سلبية ممكن تحصل بسبب الأزمة دي زي اننا مش كفايه او مش محبوبين أو عمرنا ما هننجح في أي علاقة في المستقبل
بعد المرحلة دي بقي نقدر نمسح الصور والرسائل و نعمل البلوكات و نرجع نمارس حياتنا الطبيعية من جديد من غير كبت ولا تجنب و لا استثارة عقلية تعيق التعافي وتجلب الإضطرابات