مرضي اضطراب الشخصية الحدية معروفين بإندافعيتهم الشديدة و دا بيخليهم يدخلوا في خلافات ومشادات كتير في أماكن العمل و العلاقات و علشان كده كتير منهم مش بيعمر في شغلانه واحده فترة طويلة ، لكن لإندفاعيتهم دي وجه آخر ، مرضي اضطراب الشخصية الحدية أشخاص حقيقيين جدا بيكرهوا التزييف والتناقض، لما مثلا مدير في الشغل يظلم موظف عنده فزمايله هينصحوه غالبا بإنه يلم الدور علشان يحافظ علي شغله أو مثلا هينصحوه يسيب الشغل و يشوف شغل تاني طالما المدير حاطه في دماغه أو بالكتير اوي هيدعموه بينهم وبينه و يطيطبوا عليه ، انما صاحب اضطراب الشخصية الحدية هيدخل يتخانق مع المدير دفاعا عن زميله وينتهي الأمر بإن هو اللي هيسيب الشغل ، دا يمكن مش تصرف حكيم لكنه ربما تصرف أكثر صدقا وإنسانية و اتساقا مع الذات ، دي اندفاعية بحب اسميها الإندفاعية الطيبة ، اندفاعية لتحقيق قيم عليا ، قيم الحق والخير والجمال في عالم محكوم بقيم الأمان والإستقرار والحفاظ علي لقمة العيش