أظن ان من الأمور المهمة جدا في العلاقات الصحية هو ان الطرفين يبقي عندهم ما يمكن تسميته برفاهية الإستغناء، القدرة انهم ينسحبوا من العلاقة لو اصبحت مضرة ليهم، القدرة دي مهم تبقي موجودة مش بس علشان لما العلاقة تبقي مؤذية الطرف المتضرر يقدر يمشي لكن مهمة كمان علشان تفضل العلاقة متوازنة، رفاهية الإستغناء هتخلي كل طرف مش ضامن التاني و بالتالي هتخليه مايستقواش عليه و مايقللش منه و مايعملوش كإنه لا شئ
رفاهية الإستغناء بتتكون لما تكون العلاقة دي مش هي كل الحياة، عندي حياتي الخاصة و احلامي المستقلة عن العلاقة، عندي دايما احتمالية ان العلاقة تفشل قائمة ومش معتبر ان دا اخر الدنيا، مؤمن دايما بحقي في علاقة صحية و آمنة و مؤمن بقدرتي علي الحب من جديد لو اضطريت في اي لحظة للإنسحاب