من الأفكار اللي بتؤخر التعافي الوجداني بعد الإنفصال أو بعد انتهاء العلاقات العاطفية هو ما يسمي بال control fallacy أو مغالطة السيطرة و هو عبارة عن اعتقاد الشخص أنه يملك سيطرة كاملة علي حياته و علي تجاربه و بالتالي فهو مسؤول عن أي حاجه سيئة تحصله و أنها حصلت بسبب تقصيره و انه كان عنده القدرة أنه يمنعها فمثلا بعد انتهاء العلاقة هيقعد الشخص اللي عنده الخطأ المعرفي دا يفتكر كل موقف كان ممكن يتصرف فيه بشكل مختلف ، كل مرة كان قاسي شوية أو كل مرة كان كئيب شوية أو كل مرة كان متطلب شوية و يستنتج أن العلاقة انتهت بسبب التصرفات دي و أنه لولاها كان زمان العلاقة لسه مكملة ، وكإن كان مطلوب انك ماتغلطش خالص في العلاقة و مايبقاش ليك أي هفوة ومايظهرش منك أي عيب
الخطأ المعرفي هنا هو أن أي علاقة في الحقيقة لا تقع تحت سيطرة طرف واحد فيها ، يعني انت هتفتكر كل موقف كان ممكن تتصرف فيه بشكل مختلف لكن مش هتفتكر كل موقف كان الطرف التاني ممكن يتصرف فيه بشكل مختلف برضه وهتفتكر كل موقف غلط عملته ساهم في تدهور العلاقة بس مش هتفتكر كل جهد بذلته وكل تضحية قدمتها علشان العلاقة تستمر
العلاقات بتنتهي لما الطرفين بيفشلوا يوفوا احتياجات بعض و دا مش دايما بيكون خطأ حد ، مفيش حد فينا كامل أو مثالي لكن العلاقة مانتهتش بالضرورة بسبب عيب جذري في شخصية أحد الطرفين ، العلاقات بتنتهي طول الوقت ، يمكن أكتر من العلاقات اللي بتبتدي و مش دايما بيكون عندنا سيطرة كامله علي النهاية دي مهما اتصرفنا بشكل مختلف أو كنا مثاليين تماما في العلاقة و هو أمر مستحيل تماما أصلا