في مصطلح مهم جدا في العلاقات السامة المؤذية اسمه ال hoovering و هو عبارة عن محاولة الشخص المؤذي النرجسي انه يرجع تاني لضحيته بعد ما سابها و دمرها و تلاعب بيها
الشخص النرجسي ( سواء كان راجل او ست) لما بيسيب ضحيته بعد ما اخذ منها ما يحتاجه و اتغذي بحبها واعجابها وتدعيمها لذاته الترجسية بيستمتع قليلا بإنتصاره لحد ما تانك التغذية بتاعه يبتدي يخلص فيضطر يرجع تاني علشان يملاه، كمان لما بيلاقي ان ضحيته ابتدت ترجع لحياتها من جديد و تلملم اشلائها بيحس انه فقد السيطرة، بيحس انه يمكن تجاوزه وانه بيفقد تدريجا أثره علي ضحاياة، وقتها الشخص النرجسي بيقرر يرجع تاني لضحيته علشان يثبت لنفسه انه لسه موجود و مسيطر و قادر علي التاثير
بيرجع تحت ادعائات كتير، انه اتغير و انه هيروح يتعالج و انه مستعد لكل العقوبات، بيستدر تعاطف ضحيته بذكرياتهم مع بعض او بدراما شخصية بينسجها حوالين نفسه علشان يوقع بيها من جديد
الضحية بتقرر ترجع تاني لأسباب كتير منها انها عايشة في دور المنقذ اللي هيصلح العالم أو انها رابطة شعورها بالأمان والحب بالشخص النرجسي أو بسبب لومها لنفسها و تحميلها ذنب فشل العلاقة في المرة الأولي، بترجع الضحية علشان تكرر دايرة العنف من جديد اللي بتبتدي بالحب والإنبهار مرورا بالإنتقاد المستمر و العقاب و انتهاءا بالتجاهل التام و الإهمال، بتكرر الدايرة من جديد لكن المرة دي بشكل أكثر ألما و عنفا و دمارا
ازاي نمنع ال hoovering من الحدوث و نحمي نفسنا من تكرار دايرة العنف
اول حاجه هو قاعدة no contact، بنقطع الطريق علي أي وسيلة يمكن انه يستخدمها الشخص النرجسي علشان يكلمنا من خلالها و بنحذف كل الوسائل اللي ممكن تمكنه من الوصول لينا من جديد
بنتوقف عن التفكير الوسواسي في احتمالية رجوعه و نبطل نتسني ده علشان نثبت لنفسنا شئ ما و بنلتفت لحياتنا من جديد و أخيرا لو حصل و قدر يتواصل معانا مش بنرد بأي شكل من الاشكال، أي رد حتي لو كان في شكل هجوم أو رفض بيغذي ذاته النرجسية و بيزيده حماس و محاولة و اصرار علي الإيقاع بينا من جديد