من المشاهد اللطيفة جدا في مسلسل هاوس لما جيمس ويلسون بدأ يصارح حبيبته بحاجات مش بيحبها فيها، زي انها بتحط علبة اللبن في باب التلاجه مش في التلاجة من جوا و دا بيخليه يبقي مش بارد لما بييجي يشربه أو انها بتحط فنجان القهوة علي الكتاب مباشرة مش علي طبق صغير فممكن الكتاب يبقع او انها بعد ما بتخلص علبة مناديل الحمام مش بتستبدلها بواحدة جديدة، ويلسون كان متعود يسكت عن الحاجات دي ويستحملها رغم غيظه منها و يعملها هو من سكات بس قرر انه يبطل يسكت و يصرح بيها بناءا علي تحريض صديقه دكتور هاوس، لما قالها عن الحاجات دي المناقشة احتدت بينهم و بدأوا يتهموا بعض و يقولوا كلام مؤذي انتهي بإن حبيبته قررت تسيبه، ويلسون راح لهاوس و قاله انه كان يمكن أن أبقي فمي مغلقا و كنت هتضايق من تصرفاتها في بعض الأحيان بس كنت هبقي سعيد بوجودها، دلوقتي اصبح كل ما أملك هو لبن بارد
الجملة الأخيرة دي من الجمل المبهرة و تصلح كمثال شديد الدلالة علي غباءنا في إدارة العلاقات ، ازاي احنا ممكن نضحي بحاجات عظيمة جدا، علاقات انسانية لا تعوض، علشان أتفه الأسباب و علشان عناد متبادل بشأن تفاصيل كان يمكن تجاوزها بسهولة ، علشان نكتشف بعد فقدان العلاقات دي انه لم يتبقي لينا شئ غير تلك الأشياء التافهة والتفاصيل عديمة الفائدة زي بالظبط ما تبقي لويلسون اللبن البارد و الكتاب النظيف و علبة المناديل المتجددة بأستمرار