فى فيلم Enough Said و هو فيلم عظيم بالمناسبة دخلت البطلة فى علاقة جديدة بعد طلاقها وبدا لها انها وقعت فى الحب من جديد لكنها بالصدفة قابلت الزوجة السابقة لحبيبها الجديد واللى بدأت تحكى عنه بعض العيوب اللى تسببت فى طلاقهم (انه تخين و فوضوى وله عادات غريبة فى الاكل والكلام) وكلها أمور مكنتش البطلة تجهلها أبدا لكن لأول مرة تدركها كنقائص أو بمعنى آخر أول مرة تدركها بمعزل عن إدراكها لشخصيته ككل، بدأت تراقبه و هو بياكل و تراقبه و هو بيتكلم، بدأت تركز مع شكله و وزنه و تنتقد عشوائيته و قلة نظامه، بدأت تتغير نحو حبيبها تدريجيا وتبدأ تفكر من جديد فى مدى صدق مشاعرها تجاهه، و كإنه في لحظة واحده ادراكها ليه تغير بالكامل و أصبح ادراك جديد مشوه و ناقص
النقائص مش شئ مطلق، النقائص هي الأشياء اللي بنشوفها نقائص و نديها معني وأهمية و نسمح ليها بالسيطرة علي رؤيتنا لشخص ما لدرجة انها بتستحوذ علي ادراكنا بالكامل و بتعمي عينينا عن رؤية الحقيقة، رؤية الصورة الكلية للأشياء، الأمر في العلاقات شديد التعقيد بيحتاج حكمة و تروي و بيحتاج اختيار دقيق لمعاركنا وللأشياء اللي يجب الوقوف عندها و بيحتاج تفويت هادي و خفيف لكل ما يمكن تفويته من غير مصارحة مرهقة لكل صغيرة و كبيرة و من غير كتم في القلب ولا حساب للنقط