من الحاجات اللي بلاحظ دايما انها بتؤخر التعافي بعد العلاقات الفاشلة هو فكرة عدم الفهم ، ان الشخص يبقي مش فاهم ايه اللي حصل وليه حصل ويبدأ يتسائل اسئلة من نوعية طب لما عملت كذا كانت تقصد ايه أو لما قال كذا قاله ليه أو طالما مش بيحبني كان اتصرف كده بناءا علي ايه او أيا كان يعني ، و الحقيقة مشكلة النوع دا من الأسئلة انها بتفترض ان الناس دايما بتبقي عارفه و فاهمة كويس هي بتعمل ايه وبتعمله ليه، بتفترض ان الناس بتتصرف بمنطقية و اتساق مع نفسها طول الوقت والحقيقة دا أبعد ما يكون عن الواقع يعني، غالبا الطرف التاني دا نفسه مش عارف هو عمل كده أو قال كده ليه
في مشهد لطيف جدا في فيلم the fault in our stars لما حبيبة ايزاك قررت انها تسيبه و هو علي وشك الإصابة بالعمي بعد ما كانت وعدته قبلها بالبقاء فبيشتكي لصاحبه انه ليه طيب وعدتني انها هتفضل طالما هتمشي في الآخر فقاله Some people don't understand the promises they're making when they make them
بعض الناس لا يفهمون معني الوعود التي يقطعونها عندما يقطعونها، و هي دي الفكرة دايما، مشكلة الأسئلة دي مش بس انها بتضيع الوقت و بتتعب القلب و بتأخر التعافي، المشكلة الكبيرة هي ان ملهاش اجابات لا عندك ولا حتي عند الطرف التاني، المشكلة الكبيرة ان عدم قبول النهاية و التدوير علي الإجابات و البحث عن نهاية مختلفة وأكثر منطقية وقبولا بتوصل دايما للأسف لنهايات أسوء بكتير