الرجل في تصوره للمرأة طبقا لكارل يونج بيمر بأربع مراحل كل مرحلة فيهم انضج من اللي قبلها
المرحلة الأولي اسمها مرحلة حواء أو إيڤا علي اسم زوجة سيدنا آدم ، هنا الرجل بيتصور المرأة كمصدر للعطاء والتغذية والأمان والحب ، الرجل في المرحلة دي مايقدرش ينتج بدون الأنثي و علاقته معاها بتكون اعتمادية بحتة و طلباته منها بتكون كتير وتوقعاته بتكون مرتفعة جدا ودا بنشوفه في الراجل اللي متوقع من زوجته عطاء غير مشروط زي عطاء أمه بدون ما يحس أنه مضطر يبذل مجهود مساوي في المقابل للأنثي ، فهي ليست شريكة حياة وانما مصدر غير مشروط للعطاء
المرحلة التانيه اسمها مرحلة هيلين علي اسم زوجة ملك اسبرطا اللي خانته وهربت مع باريس ملك طرواده ، هنا الرجل بيتصور المرأة كشخص قوي قادر علي النجاح والإبداع والتفوق ولكنه غير قادر علي الفضيلة. فالمرأة في تصوره كائن مشوب بالشر والخيانة و دا بنشوفه في الراجل الشكاك أو الراجل المتحكم اللي متصور أن الطريقة الوحيدة اللي يضمن بيها ولاء زوجته هو حبسها في البيت أو منعها من ممارسة حقوقها في العمل و خلافه
المرحلة الثالثة اسمها مرحلة مريم علي اسم السيدة مريم العذراء ، و هنا الرجل بيتصور المرأة كشخص طاهر وفاضل لا يجب أن يشوبه خطأ أو تقصير ، و دا بنشوفه في الراجل اللي بيبحث عن امرأة مثالية لا تخطئ و يصيبه الفزع والذهول من خطأ المرأة مهما كان صغير في مقابل قبوله لأخطاء أخري أكبر بكتير من الرجل
المرحلة الرابعة هي مرحلة صوفيا علي اسم كلمة الحكمة باليونانية. و هنا الرجل بيتصور المرأة كشخص كامل قائم بذاته يمتلك صفات إيجابية وسلبية و قادر علي الخطأ والفضيلة و علي النجاح والفشل وعلي العطاء والمنع و علي فعل الحق والباطل ، يتصور المرأة كإنسان لا يتميز عن الرجل بفضيلة أكبر ولا بنجاسة أشد