الشخص اللي اتظلم في شغله علشان مصلحة شخصية أو اتظلم في علاقة عاطفية و اتلعب بيه أو حتي اتظلم ظلم سياسي واتنكل بيه بيفضل منتظر تحقيق العدالة ع الأرض و نزول البلاء بالظالم
احنا اتربينا علي كده ، اتربينا أن الظلم عمره قصير و أن الظالم بيقتص بيه في الدنيا لكن دي كانت تربية غلط و معلومات غلط ملهاش أي سند من منطق أو واقع أو دين
المشكلة ان انتظار تحقق العدل بيعطلنا و بياخد من وقتنا و طاقتنا كتير ، ملتفتين عن حياتنا بحياة اللي ظلمونا و بنشوف كل شوية إذا كانت ماشية ولا لا ولما نلاقيها ماشية عادي و نلاقي حياتهم كويسه بنحبط و بنكتئب و بنعيد اختبار مسلماتنا و بنغضب من القدر و بنعطل تماما في الطريق
الظالم مش لازم هيتردله الظلم في الدنيا ، ممكن يفضل حياته كلها عايش سعيد فعلشان كده خلونا نقبل الحقيقة دي و ننتقل بأذهاننا لأحداث حياتنا الجديدة و نبطل نتابعهم و ننتظر وقوع الشر بيهم. انتظار معطل لا يفضي إلا الي مزيد من الخذلان