عايز اتكلم عن مفهوم لطيف جدا اسمه الحنو علي الذات ٱو ال self compassion
لما بنمر بظروف صعبة، مشاكل مادية مثلا، تعثر في الدراسة ٱو الشغل، فشل علاقة عاطفية. ساعتها بيكون رد فعلنا تجاه انفسنا حاجه من تلاته، يا إما بقسو علي نفسي و بنتقدها ( ٱنا السبب في الفشل دا، انا اللي عملت كده في نفسي، انا شخص سئ) يا إما بتصعب عليا نفسي ( ٱنا ضحية، ليه الناس بتعمل فيا كده، العالم دايما بيظلمني وبييجي عليا) يا اما الطريق التالت و هو طريق الحنو علي الذات، في الطريق دا انا بعمل ٣ حاجات تجاه نفسي غير القسوة ٱو الصعبنة
اول حاجه هي اللطف بالنفس self kindness ، بعمل لنفسي نفس اللي كنت هعمله لٱي حد بحبه بيمر بأزمة، لو حد بحبه بيمر بٱزمة هقلل الٱحمال من عليه ومش هطلب منه حاجه و هعذره علي اي تقصير، هحاول اهتم بٱكله و نومه، هخرجه وافسحه واخليه يغير جو و اديله فرصة انه يتكلم و يحكي و ينفس عن اللي جواه
تاني حاجه هي الإنسانية المشتركة common humanity ، بفكر نفسي دايما ان المعاناة والفشل الشخصي دا جزء من التجربة الإنسانية، كل البشر مروا بيها و مكتوب علينا اننا هنمر بيها في حياتنا مرة واتنين و تلاته، دا بيحسسنا اننا مش لوحدنا و بيطمنا ان زي ما الناس كلها تجاوزتها ٱنا كمان هتجاوزها
تالت حاجه هي اليقظة لمشاعرنا و أفكارنا، بلاحظهم و اوصفهم من غير ما احكم عليهم ولا اتجاهلهم ولا اتوحد معاهم، مشاعري و افكاري مش هي انا، انا عندي فكرة اني فاشل دي مختلفة عن انا فاشل، الافكار والمشاعر بتيجي و بتروح ومش بتلزق فينا ولا بتكمل معانا للٱبد
لو انت بتمر بٱزمة، لو حاسس بالإحباط والخزي والنقص والفشل، انت محتاج تتدرب علي مهارات ال self compassion بدل طريق القسوة و الإنتقاد أو طريق الصعبنة و الرثاء