لما النت بيفصل لأى سبب من الأسباب بيظهر مكانه على متصفج جوجل كروم لعبة كده عبارة عن ديناصور بيعدى من فوق صبار
لعبة بدائية جدا وبتتلعب بزرار واحد وحتى اللى عاملينها كانوا قاصدين يستخدموا الديناصور للدلالة اننا من غير نت بنعيش فى عصر الديناصورات
المهم فى مرة قرأت كومنت على بوست ما وعمرى ما نسيت الكومنت ده ابدا ودايما فى مخيلتى
الكومنت لبنت تقريبا بتقول انها لما بتحس بالزهق بتفصل النت علشان تلعب اللعبة دى
يمكن دا اكتر شئ حزين قرأته فى السياق ده وبيعبر بصدق شديد عن مأساة الإنسان الحديث اللى استبدل وظائفه الإجتماعية كلها بالعالم الإفتراضى ولما العالم الإفتراضى يخذله ويصيبه بالزهق والملل بيلجأ لخيارات ذات هدف واحد فقط وهو تمرير الوقت
يمكن دا نفس سبب انتشار ألعاب شديدة البساطة والبدائية زى كاندى كراش و subway وغيرها فى نفس الوقت اللى بيشهد فيه العالم طفرة غير مسبوقة فى مجال تقنية الألعاب شديدة التطور والتعقيد. الغرض من الالعاب دى مش المتعة او التسلية لإن الالعاب المتطورة أكثر متعة بالتاكيد وانما الغرض هو تمرير الوقت ولذلك كان ضرورى انها تبقى ألعاب مفتوحة بمستويات لانهائية
أزمة الإنسان فى عصر الحداثة مش أزمة مفتعلة أبدا ولا كلام للإستهلاك المحلى وانما شئ حقيقى بنحسه وبنعيشه كل يوم و الامراض النفسية المنتشرة فى العالم كله بشراسة غير مسبوقة ما هى الى احدى تجلياته
العالم كما نعرفه ينهار يا جماعة والله , يمكن لسه بدرى شوية بس الاكيد اننا بنعيش فى طور الأفول الحضارى بتعبير مالك بن نبى , فى طريقنا الى الهاوية