الإكتئاب هو العلاج المعرفى cognitive therapy وده لإنه غالبا مرضى الإكتئاب بيبقى عندهم نظرة سلبية تجاه أنفسهم (شعور بإنعدام القيمة ) وتجاه المجتمع والحياة فإنت دورك كطبيب انك تصلح النظرة دى من خلال العلاج المعرفى الى جانب العلاج الدوائى و العلاج النفسى والسلوكى طبعا
لكن ماذا لو كان هو فعلا عديم القيمة وماذا لو كانت الحياة فعلا بذلك السوء وبتلك العدمية و الإكتئاب أصبح مش بسبب نظرته الخاطئة لنفسه وللمجتمع والحياة وانما بسبب انه أدرك الحقيقة بينما يعيش الأخرون فى سعادة لا لشئ الا لأنهم مغفلين مش أكتر
دا نوع من الإكتئاب ممكن نسميه الإكتئاب الإدراكى او الإكتئاب الوجودى وده مش هينفع معاه علاج دوائى لإن مفيش خلل فى كيمياء المخ ولا حاجة والسيروتونين زى الفل ولا هينفع معاه علاج نفسى لإن مفيش مشكلة نفسية أصلا ولا هينفع معاه علاج معرفى لإن المشكلة أساسا إدراكية ولا حتى هتنفع معاه جلسات (الكهرباء)
ربما يكون الحل وقتها فى النقيض تماما , فى تثبيت فكرة العدمية وإنعدام القيمة , فى السخرية من النفس و من الحياة ومن مشاكلنا و التعايش مع الحقائق دى من غير ما نحاول نغيرها و فى التمسك بنصيحة كونيرا لما قال (أدركنا منذ زمن طويل أنه لم يعد بالإمكان قلب هذا العالم، ولا تغييره إلى الأفضل، ولا إيقاف جريانه البائس إلى الأمام. لم يكن ثمة سوى مقاومة وحيدة ممكنة : ألّا نأخذه على محمل الجد)
يمكن أول واحد انتبه لكده كان فرويد لما جاله شخص وصفه فرويد بإنه (بغيض جدا ) وقاله انا كل الناس بتكرهنى فتفهم فرويد فورا ان مشكلته هى فى إدراك الحقيقة وان سلاح السخرية وتحويل الامر لشئ أشبه بالنكته ربما يكون مفيد هنا فرد عليه و قاله ان كلامك سخيف جدا لإنك لسه مقابلتش كل الناس , انت مكروه من كل اللى قابلوك بس