ً
ً

حياك الله اخوي
قبل ابدا ..
بصراحه اعجبتني يوم اخذت حقك
بردت كبدي فيهم
لان ما احب اللي يسكت عن حقه
لكن انت ما قصرت جلدتهم ..

يلا نبدا ..

قريت قصتك
بس احس فيها اشياء ما ذكرتها
مثل وش السبب لنظرته لك كذا؟
مافي شي يجي من غير سبب
يعني هل كنت مثلاً
اشطر منه في الدراسة ؟
او عندك فلوس وما عنده
او عندك علاقات طيبه مع الطلاب
وهو ما عنده نفس علاقاتك
او حس بان ودك تتعرف عليه
وجا في باله بان له اهميه
وبانه محور الكون
واخر حبه في الدنيا
او حسسته بانك
متعلق فيه ومعجب ؟
او ايش السبب !

احسك ما ذكرت السبب الرئيسي
واللي خلاه ينظر لك كذا !
لان معرفة السبب الحقيقي
تبين السر اللي دفعه يتصرف
معاك بهذا التصرف

عموماً .. كلنا كنا مثلك
نتعرض لبعض التنمر واللقافه
والغيرة والحسد وشوفة النفس
وياما مردغنا وتمردغنا
ومثل ما يقولون :
" الرجال يضرب وينضرب "
وطبيعي يصير مثل كذا
وكانت اغلب المشاكل
بالمرحله المتوسطه
وفي الثانوي قلت كثير


اما مسألة هل راح يتسبب
لك بضرر في المستقبل ؟

ابداً لا تخاف ما راح يضرك
لان مشاكلكم كانت وانتوا صغار
لكن بعد ما كبرتوا ما راح تتكرر
ممكن يكتفي بتطنيشك فقط
غير ذلك مافي شي

بس المهم كن واثق من نفسك
فهمت ؟ كن واثق من نفسك
لان الثقة تجعلك قوي
وما تفكر فيه ولا تهتم
ولو حصل وقابلته
وانت واثق من نفسك
ما راح تتحسس من نظراته
او من حركاته وطريقة تصرفه
لانك اصلا مو معطيه وجه
حتى لو كان جالس قدامك
راح تتصرف وتسولف وكأن مو موجود
لان ما يهمك ولا يمثل عندك شي

بس اذا بقيت متحسس وخايف
وتتصرف تصرفات ذاك
اللي يقول ترا منتبه لك
صدقني تبقى في نظره مغلوب
وضعيف وما يشوفك شي

حتى السلام عليه اتركه
لا تقول ما يجوز كيف كذا !
إلا يجوز دام ما يرد عليك السلام
المهم لا تسلم عليه ولا تلتفت له
ولا تحسسه بان له تاثير

طبعاً اذا ما سمعت كلامي
وبقيت تسوي نفس حركاتك قبل
فمن الممكن يبتزك ويتحكم في مشاعرك
ويعيشك في قلق وخوف وترقب

كن قوي واترك الطيبة الزايدة
لان مثل ذا ما تنفع معاه الطيبة
ذا ينفع معاه تطنشه
وما تعطيه اي اهميه


اما عن نظرته لك
فاظنه يشوفك انسان
ضعيف وعاطفي
وطيب اكثر من اللازم
عشان كذا غير من وضعك
ومن تفكيرك ومن تصرفاتك
وازرع في نفسك الثقة والقوه

ولعلمك الناس لما تشوف
واحد طيب اكثر من اللازم
وحساس .. ما تعده شي
وتقول عنه مسكين

فكر معي زين :
هل انت محتاج له ؟
هل ماسك عليك شي ؟
هل مافي الدنيا الا هو عشان
يحتل كل مساحات افكارك ؟

اذا كان جوابك لا
خلاص عش حياتك طبيعي
ولو قابلته عند اقاربك
خليك عادي جداً
ولا تبين له اي شي
لا تبين بانك مطنشه
ولا تبين بان له تاثير
يعني سولف واضحك
وسو اللي ودك فيه
وكأن مو موجود معاكم

لا تجعله سبب حقيقي
في عدم حضورك للمناسبات
او يكون سبب في عدم ارتياحك
او تفكر تكسبه وتتود له
عشان تسلم من شره وترتاح
وتظل تتحسس اذا مر وما سلم عليك
كل ذا الاشياء شيلها من راسك
وعش حياتك بثقة واعتزاز


طولت الكلام عليك
بس عساك تستوعب
واذا فيه اي توضيح
اتمنى ترجع وترد وتوضح


يسر الله امرك وحفظك ورعاك


تقديري

ِ