الستات في مجتمعنا عندهم لغة غريبه جدا في الكلام عن الرجاله..
اصل هو امه اللي محرضاه..
اصل اخته اللي سايقاه..
اصل هي اللي ضحكت عليه..
اصل هي اللي لفت عليه..
اصل مراته اللي وزاه علينا..
اصل وبعدين واحده ست تانيه وبعدين بتحركه ازاي..
في كل الجمل هو الراجل مجرد مفعول به..
مجرد حاجه واحده تانيه بتحركها..
والجمل دي بتتقال من كل فئات الشعب.. بقناعه مطلقة..
وللأسف الشديد عادة اللي بتقولها ستات..
ليه وازاي وامتى الستات عملت كده؟ معرفش.
بس هو شئ ملفت للنظر.. والستات حتى مش بتاخد بالها من كم الاهانه للراجل اللي في الجمل دي.
اللي بتتعامل معاه على انه مجرد مفعول به..
ولا بتاخد بالها انهم بيشيلوا بني جنسهم الليله.. هو دايما فيه واحده ست ورا المصيبة..
والحقيقه اللي مش بفهمه.. التضارب الصارخ بين التعبيرات دي.. وبين الافكار المجتمعيه عن قيادة الرجل وان هو اللي بيوجه وهو المسؤول وهو المفروض يعمل والمفروض يسوي والمفروض والمفروض..
لا نرسى على بر كده..
ده احنا مجتمع فيه جمله زي ابن امه شتيمه..
وكأنه المفروض يبقى ابن حد تاني مثلا..
في الوقت اللي الناس بتقول فيه الجمل دي بمنتهى التلقائية.. الا ان اللغة اللي بيستخدمها المجتمع.. بتحكي كتير اوي عنه..من غير حتى ما ناخد بالنا..
يعني تخيلوا ان تعقيباً على الجمل دي.. حابه ألفت نظركم ان الراجل كائن عاقل بالغ مكلف.. مش مجرد شخليله في ايد حد.
نعمل حركه لتحرير الرجاله بقا من السيطره النسائية