لو جوزك راجل طيب ومستقيم ...وبيحبك وبيحب ولادكم ... وبيسعى على رزقكم وبيأكلكم حلال ... وبيصلي ويعرف ربنا ... وحنين عليكي ومش بيهيينك ومش بتهوني عليه.... يبقى ده راجل كويس.
ممكن يكون مش رومانسي او مش بيقول كلام حلو ...او مش بيسمعك بالشكل اللي يرضيكي ...ودي مشكلة فعلا ...وحقك عليه انه يشبعك عاطفيا ...ومهم انه يتفهم احتياجاتك ويدور على اللي يسعدك ... لكن ده مش معناه ان الحياة معاه لا تطاق
لو مراتك طيبة ... وبتحافظ على إسمك وعرضك في وجودك وفي غيابك .. ومهتمة بأولادكم ...وبتصلي ومحتشمة وتعرف ربنا...وإنسانة مرنة ولينة ومش عنيدة... وعارفة حقك عليها كزوج .. ومش بتقطعك من أهلك ومش بتدفعك بطلباتها الكتير للفلوس الحرام ... يبقى دي زوجة كويسة.
ممكن تكون هي مقصرة شوية في شكلها او مش فرفوشة ودلوعة بالشكل اللي يرضيك... او مقصرة شوية في تفصيلة او اكتر في مسئوليات البيت... لكن ده مش معناه ان الحياة معاها لا تطاق
كل البيوت فيها مشاكل وكلنا عندنا عيوب ...وكون ان فيه شوية مشاكل في التواصل او في حاجات تانية ... ده مش معناه ان الدنيا تسود في عينينا واننا نفكر في الطلاق ((إلا لو إتأكدنا فعلا ان العيوب دي مش قادرين نتجاوزها فعلا))
انا بقول الكلام ده ليه؟ ... لان في بيوت كتير بقى فيها حالة من السخط و التركيز على الحاجات اللي ناقصة ... والناس بقت بتستسهل الطلاق ..وده لأسباب كتير نتكلم عنها لاحقا .
إسألوني انا ... وانا اقولكم على البيوت اللي فيها مصايب فعلا .... انا بيجيلي إستشارات لبيوت فيها الطرفين بينهم إهانات وعنف وخيانات وقطيعة رحم وإضطرابات نفسية ..الخ.
فلو بيتكم بيت كويس... حاوطوا عليه ... وحلوا مشاكلكم ...وتغافلوا ..وشوفوا الحلو اللي عندكم.. ولا تنسوا الفضل بينكم ❤
ملحوظة : البوست مش تبرير للاهمال والتقصير .... البوست هدفه إننا نحاول نكون منصفين ونحاول نحط كل مشكلة في حجمها ونحاول نحلها او نتغافل عنها
ولكن لو الموضوع غير محتمل فعلا... ومش قادرين نتجاوز ... يبقى تسريح بإحسان