العيان محتاج حد يزوره يخفف عنه...أهل المتوفى محتاجين حد يطبطب عليهم ... الناس الكبيرة في السن محتاجين حد يتفقد أحوالهم...المكتئب محتاج حد يطمن عليه .. والناجح محتاج حد يقوله براڤو... وده الاصل شرعا وعرفا.
الترابط والتواصل بين الناس مهم لنفسية الفرد ومهم لسلامة المجتمع بشكل عام
المشكلة إننا ألزمنا نفسنا بعادات إجتماعية خلت التواصل مع الناس حاجة مرهقة ومكلفة جدا......زي انه لازم لما تزور حد تاخد معاك حاجة غالية بغض النظر عن حالتك المادية.... وزي ان البنت ماينفعش تروح نفس المكان بنفس الطقم مرتين 😃.... وان لما حد يجي يزورك لازم تعمل أكل وشرب بشكل مكلف حتي لو هاتستدين....الخ
والمشكلة كمان اننا مابقيناش نتبع آداب الإسلام في علاقتنا مع الناس اللي حوالينا ولا بقينا نعلمها لولادنا .... زي التخفيف في زيارة المريض ... والاستئذان قبل الزيارة.... وزي عدم التدخل في شؤون الغير من خلال الأسئلة المحرجة... وزي عدم السهر لوقت متأخر....الخ
بالاضافه للمشاكل العامة اللي ضربت كل بيوتنا زي الأزمة الاقتصادية ... وزي طول المسافات والتكدس المروري... وزي العمل لساعات متأخرة .
بعد الكلام اللي فوق .. بقينا نحس أن العلاقات الاجتماعية مرهقة ومكلفة ماديا ونفسيا .... وبقينا عايشين في جزر منعزلة .... وإندثرت معاني مهمة زي صلة الرحم وبر الوالدين والتخفيف عن اصحاب الالام من المرضي وغيرهم... وبقينا نسمع ان في ناس بتموت وماحدش بيحس بيها وناس بتنتحر بسبب الفقر والاكتئاب....الخ
إحنا محتاجين نرجع للبساطة ونرجع نطبق الآداب العامة في علاقتنا مع الناس.... ومحتاجين نجدد نيتنا…وقتها هانشوف أن صلة الرحم وبر الوالدين و زيارة المريض حاجات مهمة ..مش مجرد حاجات مكلفة نفسيا و ماديا.