لو مراتك بشكل عام ست كويسة ونفسيتها سوية ...لما تشتكيلك من موقف ضايقها حصل مع حد من أهلك .. و إنت بقى فسرت كلامها أحد التفسيرات الآتية:
إنها نكدية ... وبتدور على المشاكل ... وإنها المفروض تكبر دماغها وتعدي الموقف
إنها بتسخنك على أهلك ... وعاوزة تقطعك منهم
إنها بتهاجمك إنت شخصيا ... وان شكوتها من اهلك فيها إساءة ليك انت شخصيا
وقتها هاتكون بتسمعها وإنت متحفز جدا ....و بالتالي هاتتعامل معاها على أساس انها ست نكدية او شريرة ...و هاتهاجمها وهاتسفه من شكوتها
وهي لو كانت مظلومة فعلا في الموقف وعندها حق تتضايق ... وقتها هي هاتحس انك ظالمها ومش حاسس بيها ...وهاتحس بعدم الأمان ... و هاتتخانق معاك انت ... وهاتفضل طول الوقت تشتكي من اهلك في كل صغيرة وكبيرة عشان هاتكون عاوزة تثبتلك وجهة نظرها اللي انت بتنكرها... والموضوع هايكبر بينك وبينها... وبينها وبين أهلك.
رغم إنها في الغالب كانت كل اللي هي محتاجاه منك إنك تتعاطف معاها وتطيب بخاطرها....و انت لما تعمل كده ...هي هاتنسى الموقف
إسمع مراتك كويس .. و إتعاطف معاها ... وطيب بخاطرها ... وفي الغالب هي مش محتاجة منك أكتر كده ... هى بتبقى عاوزة تحس إنك حاسس بيها ومقدر انها بتتحمل سخافات ممكن تكون بتحصل عشان خاطرك
ولو الوضع فيه ظلم كبير ليها والموضوع محتاج منك أكشن مش مجرد طبطبة .... شوف اللي ممكن يتعمل بحيث إنك ترفع عنها الظلم من غير ما تكون عاق لأهلك.
لكن لو مراتك فعلا بتاعت مشاكل ونفسيتها مش مظبوطة... وفعلا بتدفعك إنك تكون عاق لأهلك ...ده موضوع تاني و اوعى تخليها تجرجرك للمساحة دي.