لما تكبر نفسيا..هتعرف تعيش الحياة solo.. قادر تكتفي بنفسك اغلب الاوقات..قادر تدير شئون حياتك وتهتم باحتياجاتك واهدافك..قادر تكون سعيد وراضي ومطمن مع نفسك وبنفسك...حياتك حلوة وسعيدة..بتحقق لنفسك السعادة دي بنفسك.
وقتها الرغبة في العلاقات هتكون نابعة من الرغبة والاحتياج للانتماء والرفقة والونس والصداقة....احتياجك هيكون لحميمية حقيقية ..فيها تبادل للشراكة والاهتمام والذات والفهم والدعم والرغبة في الكبران نفسيا اكتر مع بعض..والاختيار هيكون نتيجة ان انتم الاتنين بتقدموا ده لبعض..بتقدموا المعنى المهم ده..ان الحياة مع بعض احلى واضافة......هتكون علاقة مش نابعة من الخوف من الوحدة او الرفض او الهجر او غيرهم.. او بحث عن القيمة والاهمية والوضع الاجتماعي.
وقتها هتهرب من علاقات التطفل والاستنزاف والتلاعب والاكاذيب والتحكم والسيطرة والتنافس وعدم المشاركة ..الطفولية والمراهقة..المرهقة.....العلاقات اللي بتسيطر عليها المخاوف والانانية. مش هتحتاج كتير لعلامات ولا ريد فلاجز...هتحسها..علاقات خانقة ومستنزفة ومعطلة...عبء وانزعاج..هتحس انها بدل ما تكون ونس..بتكون وحيد..وبدل ما تكون انتماء بتبقى حالة من التيه والانفصال..وبدل ما تكون شراكة بتبقى حالة تنافس..وبدل ما تكون تفهم وانفتاح بتبقى غموض واكاذيب..وبدل ما تكون اضافة بتكون خصم منك ومزيد من الحرمان..وتفضل تسئل نفسك عن المعنى والهدف.
الكبران هيخليك تتعامل مع الدنيا والناس وانت مطمن...وهتدور على اللي مطمن واللي رغبته زي رغبتك....وهتختار البيئة والظروف اللي تناسبك..وتبعد عن اللي مش مناسب وبيعطل..وحتى ده هتعرف انه موجود..ولو جه في سكتك هتعرف تتعامل معاه بسرعة من غير ما يستنزفك ويعطل رحلتك.
كبرانك النفسي هو اللي هيساعدك...انت بس محتاج تشيل من سكة كبرانك اللي بيعطله..(ميراث طفولتك ومراهقتك...مخاوفك وتوقعاتك وافتراضاتك غير الواقعية).