الخوف على قد ما بيحمينا..بس كتير بيعطل عن الحياة والاندماج فيها.
الخوف موجود فينا عشان ننتبه للخطر..وعشان ناخد اجراءات للحماية..سلوكيات تطمنه اننا واخدين بالنا وقادرين نتعامل بكفاءة.
بس اوقات بنخاف بزيادة فبنهرب باستمرار من الموقف بدون ما نتعلم مهارات نتعامل بها معاه...وبيتغرس فينا عدم الكفاءة وعدم القدرة والعجز...وكل مرة بيتكرر الموقف بنلاقي معندناش ادوات فنهرب تاني...ونأكد على نفسنا نفس الشعور..اننا عاجزين وغير اكفاء وخايبين ومش عارفين نتصرف...ونكبر في نفس الدايرة اللي مبتنتهيش...ونضيق على نفسنا الدنيا والحركة...ونقنع نفسنا اننا في منطقة الامان...بس امان بتكلفة عالية....حرمان واحساس بالعجز وعدم الكفاءة وفقدان الثقة بالنفس.
منطقة الامان..بقت سجن...بيحدد وبيكتف.
واول طريق للخروج والتحرر..انك تعرف انك متكتف بالخوف...وان الحل انك تواجهه..تخرج من منطقة الامان ...وتتخلى عن الطرق القديمة...وتستحمل خوفك لحد ما تتعلم طرق تانية تطمنه وانت بتشتبك بالحياة...طرق فعالة ومرنة...واطمن ..انت كدة ولا كدة شاطر في الهروب...انت بس محتاج طرق تانية تستخدمها.