علاقتك مع نفسك هتنعكس على علاقتك بالاخرين...
هتاخد بالك منها وتسمع لها وتشوفها وتديها التاكيد والتقدير والاهتمام..هتحبها وتقبلها وتحترمها وتسعى لعمل الصالح لها وتشوف الانفع لها ..هتتعاطف معاها وتسامحها وتشجعها وتطبطب عليها وتحتويها وتطمنها وتهديها...هتسمح لها وتديها الاذن بالظهور والتعبير عن نفسها.
هتعرف تعمل ده مع الاخرين....ومش هتستناه بالحاح وجوع وعنف من الآخرين.
خد نفسك على محمل الجد..الناس هتعاملك بجدية...قدم لنفسك اللي انت محتاج تقدمه للآخرين...مش عارف؟ اتعلم..مش قادر؟ خد قرار...الموضوع مش لوغاريتم..تعاملك مع نفسك مهارات ممكن تعلمها.
احنا ملناش سيطرة على كيفية معاملة الناس لينا...دي حاجة بتاعتهم وتخصهم.
احنا لينا سيطرة على كيفية معاملتنا للناس..ورد فعلنا لمعاملتهم لنا...نقدر نختار ونتصرف..نرد..نتجاهل..ننبه..نبعد...نقدر ..نرفض..نستقبل..نتوقع.
نقدر نحط دواير للناس واهميتهم لنا..نقرب او نبعد.
لكن اسوء ما يمكن عمله هو اننا نتنازل بنفسنا عن انفسنا..معرفتنا بحقوقنا وممارسة قدراتنا...واللي منها الشعور بمشاعرنا والاعتراف بها وتاكيدها واحترامها والتعبير عنها والسعي لاشباعها...اننا نفقد الثقة بانفسنا وباستحقاقنا وقدراتنا على التعامل مع الاخرين.
اتعلم تختار...اتعلم تبدأ علاقات واتعلم تحافظ عليها لو مناسباك واتعلم تنهيها لو مش مناسباك واتعلم تتعامل مع انهاء الاخر لو ضد رغبتك.