شوفان الاخرين كاشخاص مستقلين وكاملي الاهلية ولهم حقوق مساوية لنا...وقبلها شوفان انفسنا كاشخاص كاملي الاهلية ..لينا حقوق مساوية للاخرين..
اننا متساويبن..لا حد احسن ولا حد اقل..لا حد اعلى قيمة من حد ولا له امتيازات احسن من التاني...او اقل منه.
هو اللي بيمهد لعلاقات متساوية وصحية ومتوازنة مع الاخرين.
اىيك فروم العالم النفسي..شايف ان علاقات البشر الاساسية هي تنويعات لحب الاخوة...(مش حب الوالدين لاطفالهم ولا حب الاطفال لوالديهم)..حب الاخوة متساوي ورايح جاي...
الاديان والمصلحون بيتكلموا على علاقات الناس انها علاقات اخوة..حب لاخيك ما تحب لنفسك...وبالتاكيد اكره له ما تكرهه لنفسك...اننا بشر سواسية لينا نفس الحق في الامان و الحرية والكرامة والحب والاهتمام والامان والعدالة والانصاف والتقدير والاحترام والدفء والرفاهية والسعادة.. الخ.
حب المتساويين بيتطلب اني اشوف الاخر كيان منفصل..اشوفه بجد..واقبله..واحب اتعرف عليه عشان افهمه مش احكم عليه او انتقده او انصحه..افهمه عشان هو جدير بالتفهم وعشان بحبه...وعايز افهم واقرب منه وازود رابطة الحب والدفء والانتماء معاه..وانا كمان بانفتح عليه عشان نفس السبب...احسه واحس مشاعره ..المه وفرحته....افهم رؤيته واهتماماته....احط نفسي مكانه واشوف الدنيا من زاويته عشان اعرف اظبط موجتي على موجته وهو يعرف يظبط موجته على موجتي.
حب المتساويين بيشوف الاخر كيان حر وحقه يكون حر...مساوي ليا مش خاضع ولا مسيطر.
حب المتساويين بيتطلب ثقة ووضوح وامانة واحترام وتقدير واهتمام وقبول وغفران وتسامح متساوي ومتبادل وقبول.
حتى خلافهم..خلاف متساويين مهتمين بحقوق بعض زي ما بيهتموا بحقوق انفسهم...متعاونين في الخلاف زي ما هما متعاونين في الاتفاق
حتى ابتعادهم مبيلغيش القاعدة..اننا متساويين وكلنا لينا نفس الحق في القرب والبعد والالم والغضب والحزن الخ.
حب المتساويين متقبل ..مش رافض ولا بيطلق احكام...حتى لو اتكلم عن سلوك مش عاجبه..بيتكلم من مبدا التساوي مش التعالي المتأمر...ولا الخضوع المستجدي.
بس في النهاية احنا ملناش سيطرة على حد قرر يعيش حياة مش متساوية..قرر يشوفها خضوع او هيمنة...امتيازات اعلى وامتيازات اقل...عشان كده المهم احنا..احنا نكون ناضجين بما يكفي ان تكون دي رؤيتنا..اننا نقرر نعيش الحياة بتساوي مع اللي قرر يعيشها بتساوي...ومبيجرجناش لصراع مين اعلى ومين اقل..مين مهيمن ومين خاضع...مين له اكتر ومين له اقل..الخ..في النهاية هيفضل البشر تنويعات وفي منهم اللي مش مهتم بعلاقات الشراكة. ومهتم بتنويعات أخرى.
نختار اللي عايزين شراكة ومهتمين بها وفاهمينها...ونكون احنا عايزينها وقدها وفاهمينها.