تلاقيت نا وياه......
ماشي وجنبه ماشيين ضناه
الغايب بعد مده
معاه عويله
قابل وكانت غايتي نمشيله
انسلم عليه ونعاتبه ونحكيله
ليش الغياب وليش طال جفاه
واذكرت كي ريته اسنين جميله
اياما وهو فاضي ونا مشكاه
كنا انتلاقوا كل يوم وليله
وماضي توارى كنت فيه امعاه
وانقطعن اخباره وين شال رحيله
عليا تباعد كنت جار احذاه
ودورت واجد مالقيت وسيله
ونحسابه الغالي مايطول رجاه
واليوم قابلته
وماحس كي ماريت من يالاه
صفقت بيديا ونا نوميله
وانقول في سري الله الله
امعاه اصغاره
غض النظر واطى عليا انظاره
عديت شوره ودمعتي منهاره
وتميت نمشي فالطريق وراه
تمتمت كلمه قلتله عبارة
وعاودت شريط الزمان امعاه
حاولت نحكيله انجيب اشارة
وانجيب ذكرى تذكره بغلاه