من احد زوايا المقهي..
هناك نعم هناك.. فالزاويه المطله علي الشارع العام ..
فتاة عراقيه من بغداد فتحت لنا قلبها لتشاركنا شيء مما يجيش في صدرها بعد ماسمعتني اسأل مسيو خفايا عن الحب وسيرة الحب وكذا المهم انها شاركتنا وبلهجتها العراقيه الجميله ..
تقول بنت بغداد..
قبل فترة .. انقهرت منه .. حتى ما كدرت ابقى بالمكان الي هوه بي ..
طبعا مدا اعرف لحد هاللحظة , ليش اذا انجرحت بسببه سواء بقصد او بدون قصد ,ما اتحمل ابقى وياه بمكان سوا , اي مكان ..
وكأنو اللمسة منه تحركني حرك ..وهوه كالعادة .. كدر يعبر عن هالشي بطريقة مجازية مميزة , لأنو فاهمني
عدّى يوم وصار يوم ثاني , كلت لازم افهّمه من شنو آني تضايقت...
زعل من كلامي , وانقهر هوه هم .. لأنو مجان ديقصد انو يفرض عليه شي .. يعني المسألة كلها
جانت سوء فهم وهذا الشي ممكن يصير .. خصوصا وانو احنا مدنسولف وجها لوجه..
المشكلة الي واجهتها بوكتها , هي
هل نفسي اعز عليه منه لو العكس ؟
ضليت مثل الي ديتكلب على فراش من النااار .. كل شوية اسأل نفسي
آني لو هوه .. أذيتي لو أذيته ..زعلي لو زعله .. وجنت اتضايق من هالاسئلة ,احس تخنكني ..
هوه جان مثل الاختبار البسيط , وممكن هواية ناس تعتبرها زعله كرامة وعزة نفس ولازم تنتظريه حتى هوه يجي ويعتذر
ويبررومن هالسوالف ..بس آني غير عن الناس .. تركيبتي غير شكل .. ما اعرف اذا هذا شي صح او غلط ..
كل الي اعرفه انو آني هيجي وياه وما اكدر اتغير .. يكفيني اني قاريته وحافظته صم ..
هذا الشخص ما ممكن اعتبره إلا جزء مني , من كياني , يعني لما اكول ( آني معناها هوه , وهوه معناها آني .. وروح وحدة بجسدين )..!
فآني اعنيها قول وفعل .. وما اكدر احسبها حساب شخصين منفصلين لكل واحد كرامته ولكل واحد شموخه وعزة نفسه
وهوه مادام غلطان لازم يجي يصالحني او العكس ,
ما استسيغ هالفكرة وياه , احسها تجارة بالنفوس ..وياه وبس .. مو ويه اي بشر ثاني .
بالمناسبة , آني ازعل عليه ومنه .. بس زعل حلو , زعل دلال , لما يعجبني اشوف شنو ممكن يسويلي حتى اصالحه ,
وشلون اكدر أأثر عليه بدلالي وانوثتي , وانغر بنفسي .. اي اشيل خشمي(ولو هوه مرفوع خلقة )..!
لما حسيته انقهر من كلامي , هالمرة صارت الأذيه اضعاف مضاعفه عندي , مو بس اضعاف..
لاء , خفت لا يروح ينام وهوه ممرتاح ومقهور مني .. وبعدين شيخلصني من نفسي الي حتاكلني..
اكل , وشلون حتغفرلي .. رحتله بسرعة ودموعي بعيني
وكتله لا تزعل مني..

وبس