يارب
ياللي خلقت الكون
ما انريد من غيرك سند لا عون
فيك الرجاء
ياللي خلقت الروح
وعارف اسرار العبد قبل ايبوح
واقصور جنتك فيها عطور اتفوح
للتايب اللي مايريد دونك دون
واقف علي بابك انريد سموح
انحبك وماعندي سواك حنون
يا الله يامنجي سفينة نوح
احشرني مع اللي في الحفظ والصون
اللي مؤمنين وصدرهم مشروح
وعلي جارهم مايمنعوا ماعون
اقراية احزابك في الكتاب ولوح
مكارم اخلاق وعقلهم موزون
ورادة مناهل فيض موش انزوح
وزخرف الدنيا عندهم مركون