الانشغال بالاشخاص المتلاعبين او المستغلين وفهمهم وفهم طبائعهم وطرقهم وعلاماتهم...مش مفيد بشكل قوي ولا بنفس قدر اهتمامنا بنفسنا احنا وفهمها ومعرفتها.
اوقات محاولة فهمهم بيعكس عادة فينا هي عادة التوجه نحو الاخرين والتركيز معاهم اكتر من التوجه نحو الذات والتركيز معاها.
اوقات بتبقى نبع من وهم محاولة اصلاحهم او امنيات انهم يتغيروا لاننا عايزينهم في حياتنا.
اوقات بتبقى محاولة لاستمرار اللعب معاهم او محاولة اثبات الذات لهم.
وكل ده مضر لينا ومؤذي ومبيقدمش لينا حاحة.
اوقات بيبقى محاولة لمعرفة علاماتهم وادواتهم عشان تجنبهم وتجنب الاعيبهم.
واوقات بتبقى محاولة لكيفية التعامل معاهم لو احنا مجبربن للتعامل معهم.
واوقات بتبقى طريقة لفهم ايه اللي حصل لنا وتأثيرهم اللي سابوه جوانا...عشان نعالجه.
ودول اوكيه مهمين وعمليين ..بس الاهم
هو اننا تعرف نفسنا .نقاط ضعفنا حدودنا..ايه اللي بيعجبنا فيهم وناقص جوانا ..نعرف االلي محتاجينه وازي نحققه...نعرف اللي بيأذينا وازاي نتعامل معاه.
كل ده محتاج نركز مع نفسنا احنا اكتر.
اني اعرف ايه اللي بيتلعب عليه جوايا..الخيط او الحبل الي بنجر ببه...اهم من اني اعرف الالاعيب اللي بتجرني..لان في النهاية هو مش هيغلب في اختراع طريقة
اني اعرف احتياجي..مخاوفي..توقعاتي...حدودي...نقاطي الملتهبة صورتي عن نفسي... اهم الف مرة....وحتى دول بتعملهم عشان بتحب نفسك وعايزها افضل..مش خوفا من حد ولا استعداد للمعركة مع حد...ولا تثبت حاجة لحد ولا تغيظ حد ولا تعجب حد...انا افضل عشان نفسي وحياتي وبس.
متضيعبش وقت انك تديهم اهمية تاني في حياتك او تحرق بنزين على الفاضي..كمان هم فاضيين للدراما والصراعات والتلاعب والايذاء ومحاولات الهيمنة والسيطرة واللامبالاة والتلون وهم اشطر منك في ده....ده ملعبهم....
.اعترف لنفسك انهم قدر موجود في الحياة عموما او اتحط في سكتك..انهم مش هيدوك اللي تتمناه حتى ولو نفذت شروطهم وانسحقت لسيطرتهم...وفي نفس الوقت اعترف انك مش هتقدر تغيرهم او تساعدهم ولو تمنيت الف مرة.....انت مش مسئول عنه..انت كل مسئوليتك تعرف تحمي نفسك منه ومتتعطلش عن حياتك...وكل ده أوله عندك انت.