كل الاساءات النفسية للكبار او الاطفال بينتج عنها شكوك ذاتية في مناطق مهمة...
المحبوبية..الكفاءة..المقدرة..القيمة..الخ.
بس اسوء ما يحدث من شكوك هي الشكوك في الذات..اشك في نفسي وحواسي...
اللي شاف فيلم اين عقلي هيعرف ده..البطل وهو بيشكك البطلة في حاجات كتير لدرجة انها قربت تتجنن.
التشكيك في الذات في الشعور في الاحاسيس في الافكار في التصرفات في الواقغ... اللي ممكن تسميه عملية غسيل مخ ممنهجة بتخليك قادر تسيطر على الآخر تماما..بتخليه عروسة ماريونيت بلا ارادة او تفكير او مناقشة او اعتراض...عملية احتلال تام له والغاء شخصيته من الاساس.
ليه الاسوء؟ لانها بتحرمه من اهم ادوات يعرف بها نفسها والواقع والحقيقة...بتحرمه من حواسه نفسها..ومبيفضلش قدامه غير الواقع اللي انت عايز تزرعه في دماغه.
اهم طرق لده:
التكذيب invalidation لمشاعره واحنياجاته ومخاوفه والامه وحالته
ال gaslighting قنابل الدخان والتتويه عشان ميشوفش كويس
قلب التربيزة عشان تشوه له الواقع وتشككه في نفسه
الاكاذيب عشان تشوه له الحقائق
حملات التشهير وابعاده عن اي حد يديله تأكيدات..عشان تحرمه من معرفة الحقيقة.
دي لو حصلت لحد كبير في علاقة بيتبهدل لسنوات لحد ما يستعيد ايمانه بنفسه.
لو حصلت لطفل ..مأساه..انت بتشكل جهازه المعرفي والنفسي حوالين شكوك عظيمة وقوية بنفسه..بتفسد عليه ادوات اكتشافه للحقيقة.
بتديله نسخة وحيدة من الواقع ..النسخة اللي انت عايزها بس..وبتحرمه من ادوات اكتشاف زيفها واكاذيبها.
لما الناس بتخرج من الحالة دي بيكتشفوا انهم كانوا عايشين كدبة كبيرة..كدبة اسمها عائلة او صداقة او حب او حتى جماعة...وبيتهموا نفسهم اوقات بالغباء...ازاي مكنوش شايفين..او بيحسوا بالخيانة ازاي وثقوا في حد وهو بيزيف كل حاجة.
يمكن واحدة من اهم اسباب طلب البعض للعلاج هو طلب ال validation...ويمكن واحدة من اهم المهام اعادة ايمان المريض الايمان بنفسه وتصديق حواسه ومشاعره...ويتعلم يصدقها ويأكدها.
يمكن المهمة تبان سهلة..بس مقاومة المريض للاتصال بمشاعره او تصديقها وتمسكه بمضمون الشكوك الذاتية بيخليها بالغة الصعوبة.